ಸೋಮವಾರ, ಡಿಸೆಂಬರ್ 18, 2017

ಗೋಡೆಗಳ ದಾಟುತ್ತ...



ಅಂದು ಬೆಳಿಗ್ಗೆಯೇ ದತ್ತಣ್ಣಿ ತನ್ನ ಗೆಳೆಯ ದಸ್ತಗೀರನಿಗೆ ಫೋನು ಮಾಡಲು ಎರಡು ಕಾರಣಗಳಿದ್ದವು. ಅಂದು ದಸ್ತಗೀರನ ಹುಟ್ಟಿದಹಬ್ಬ ಅಂತೆಯೇ ನಿನ್ನೆ ಎಲ್ಲ ಟಿವಿ ಚಾನಲಗಳಲ್ಲಿ ಬಂದ ದಸ್ತಗೀರನ ಸಂದರ್ಶನ. ಗೆಳೆಯನ ಉತ್ತರಕ್ಕೂ ಕಾಯದೇ ಭೆಟ್ಟಿಯಾಗಲು ಬರುವುದಾಗಿ ಹೇಳಿ ಫೋನು ಇಟ್ಟ. ಕೇವಲ ಅಸೀೀಪನ ತಂದೆ ಆಗಿದ್ದಕ್ಕಾಗಿ ಅವ ಕೇಳಬಾರದ ಪ್ರಶ್ನೆಗಳಿಗೆಲ್ಲ ಉತ್ತರಿಸಬೇಕಾಗಿತ್ತು,ಮಾತ್ರವಲ್ಲ ಮಗ ಹೀಗೆ ಮಾಡಿದ ಅದಕ್ಕೆ ನನಗೇಕೆ ಈ ಶಿಕ್ಷೆ ಎಂಬ ಅವನ ಅಳಲು ಮೂಕರೋದನವಾಗಿತ್ತು. ಅಸೀಫನಿಗೆ ದೆಹಲಿಯಿಂದ ಬಂದ ವಿಶೇಷತಂಡದವರು ಅಪರಾತ್ರಿ ಕರಕೊಂಡು ಹೋಗಿದ್ದರು. ಗೋವಾದಲ್ಲಿ ಈ ಹಿಂದೆ ಬಂಧಿತನಾದ ಕಾಸಿಂ ಎಂಬಾತ ಅಸೀಫನ ಹೆಸರೂ ತಗೊಂಡಿದ್ದ. ಕಾಸಿಂ ದೇಶದತುಂಬ ವಿಧ್ವಂಸಕ ಕೆಲಸದ ಪ್ಲಾನ ಮಾಡಿದವರ ಗುಂಪಿನಲ್ಲಿದ್ದ. ಕೆಲದಿನದ ಹಿಂದೆ ಹುಬ್ಬಳ್ಳಿಗೂ ಅವ ಬಂದಿದ್ದ ಹಾಗೆಯೇ ಅಲ್ಲಿಯ ಮಸೀದಿಯಲ್ಲಿ ಅಸೀಫ ಹಾಗೂ ಇತರೇ ಹುಡುಗರ ಜೊತೆ ಭೆಟ್ಟಿಯಾಗಿದ್ದ ಒಂದು ಸ್ಲೀಪರಸೆಲ್ ಹುಬ್ಬಳ್ಳಿಯಲ್ಲೂ ತಯಾರಾಗುವ ಹಂತದಲ್ಲಿತ್ತು ಅಸೀಫ ಅದರ ಮುಖ್ಯಸ್ಥನ ಜವಾಬದಾರಿ ಹೊತ್ತಿದ್ದ ಅಂತ ಚಾನೆಲನಲ್ಲಿ ಬಿತ್ತರವಾದ ಸುದ್ದಿ. ಟಿವಿಯವರು ದಸ್ತಗೀರನಿಗೆ ಸುತ್ತುವರೆದು ಪ್ರಶ್ನೆಗಳ ಕೇಳಿದ್ದರು. ಮಗನ ಈ ಚಟುವಟಿಕೆಗಳ ಬಗ್ಗೆ ಅವನಿಗೆ ಗೊತ್ತಿಲ್ಲ ಎಂಬ ಅವನ ವಿವರಣೆ ಮಾಧ್ಯಮದವರಿಗೆ ತೃಪ್ತಿತಂದಿರಲಿಲ್ಲ. ಸಮಜಾಯಿಶಿ ಕೊಟ್ಟು ಕೊಟ್ಟು ಸುಸ್ತಾದವ ಅಳಲು ತೊಡಗಿದ. ಚಾನಲನಲ್ಲಿ ಗೆಳೆಯ ಅಳುತ್ತಿರುವ ದೃಶ್ಯ ದತ್ತಣ್ಣಿಗೆ ನೋವು ತರಿಸಿತ್ತು. ಕೂಡಲೇ ಫೋನಮಾಡಿ ಗೆಳೆಯನಿಗೆ ಸಮಾಧಾನ ಹೇಳುವ ಅವನ ಆಸೆಗೆ ನೀರುಎರಚಿದ್ದು ಹೆಂಡತಿ ಮತ್ತು ಮಗ ಅನಂತ. ಅನಂತನಿಗೆ ಅಪ್ಪನ ಈ ಗೆಳೆತನ ಮನಸ್ಸಿಗೆ ಬರುತ್ತಿರಲಿಲ್ಲ. ಅನೇಕ ಸಲ ಅಪ್ಪನ ಜೊತೆ ಈ ಬಗ್ಗೆ ವಾದಮಾಡಿದ್ದ. ಆ ಜನರ ಸ್ನೇಹ ಸಹವಾಸ ಬೇಡ ಇದು ಅವನ ವಾದ. ಅವನ ಮಾತು ಮೀರಿ ದತ್ತಣ್ಣಿ ಸ್ನೇಹ ಇಟ್ಟುಕೊಂಡಿದ್ದ.  ಹಾಗೆ ನೋಡಿದರೆ ದತ್ತಣ್ಣಿಯ ತಂದೆ ಮತ್ತು ಅಸೀಫನ ತಂದೆಯೂ ಗೆಳೆಯರು,ಇಬ್ಬರೂ ರೇಲ್ವೆವರ್ಕಶಾಪಿನಲ್ಲಿಜೊತೆಗೆ ಕೆಲಸ ಮಾಡುವವರು. ತಮ್ಮ ಮಕ್ಕಳು ಒಂದೇ ಸಾಲೆಯಲ್ಲಿ ಕಲಿಯಲಿ ಎಂಬ ಅವರ ಬಯಕೆ ಕೈಗೂಡಿತ್ತು. ಕನ್ನಡ ಎರಡನೇ ನಂಬರ ಸಾಲೆಯಿಂದ ಹಿಡಿದು ಪಿಯುಸಿ ಎರಡನೇ ವರ್ಷದವರೆಗೂ ದತ್ತಣ್ಣಿ ಮತ್ತು ದಸ್ತಗೀರ ಜೊತೆಯಾಗಿ ಕಲಿತವರು. ದಸ್ತಗೀರನ ತಂದೆ ಕೆಲಸದಲ್ಲಿದ್ದಾಗಲೇ ತೀರಿಕೊಂಡಾಗ ಅನುಕಂಪದ ಆಧಾರದ ಮೇಲೆ ದಸ್ತಗೀರ ನಿಗೆ ರೇಲ್ವೆ ಇಲಾಖೆಯಲ್ಲಿ ಕೆಲಸ ಸಿಕ್ಕಿತು. ದತ್ತಣ್ಣಿಯ ಅವ್ವನಿಗೂ ದಸ್ತಗೀರನ ಮೇಲೆ ಅಭಿಮಾನ..ದೀಪಾವಳಿ ಹಬ್ಬಕ್ಕೆ ಫರಾಳ ತಿನ್ನಲು ಅವ ಹಾಜರಾಗಬೇಕು. "ನೀವು ಬ್ರಾಂಬ್ರು ಭಾರಿ ರುಚಿಯಾಗಿ ಮಾಡತೀರಿ.." ಅಂತ ಹೊಗಳುತ್ತ ಒಂದೆರಡು ಉಂಡಿ ಹೆಚ್ಚಿಗೆಯೇ ಅವ ತಿನ್ನುವುದಿತ್ತು.ಹಂಗ ಮೊಹರಂ ಹಬ್ಬದ ಚೊಂಗೆ, ಈದ್ ಹಬ್ಬದ ಸುರಕುಂಬ, ಬಿರಿಯಾನಿ ಅಂದರೆ ದತ್ತಣ್ಣಿಗೆ ಪಂಚಪ್ರಾಣ.


ಹುಬ್ಬಳ್ಳಿಯ ಉಣಕಲ್ ಕೆರೆ ಅನೇಕಸಲ ಬತ್ತಿ ತುಂಬಿ ತುಳುಕಿತ್ತು. ಊರಲ್ಲಿ ಹಿಂದು ಮುಸ್ಲಿಂರ ದಂಗೆ ನಡೆಯುತ್ತಿದ್ದವು ಅದು ಬಾಬರಿ ಮಸೀದಿಯ ಗಲಾಟೆ ಇರಬಹುದು, ಈದಗಾದ ಝಂಡಾಹಾರಿಸುವ ವಿಚಾರ ಇರಬಹುದು ಅಥವಾ ಪ್ರತಿವರ್ಷ ಹಟಕೂನ ನಡೆಯುವ ಂಗಪಂಚಮಿಯ ಧಾಂಧಲೆ ಇರಬಹುದು ,ಇಡೀ ಊರು ಹೊತ್ತಿ ಉರಿಯುತ್ತಿದ್ದರೂ ಇವರಿಬ್ಬರ ಗೆಳೆತನಕ್ಕೆ ಅದು ಅಡ್ಡಿ ಬಂದಿರಲಿಲ್ಲ.ದತ್ತಣ್ಣಿ ವಾಸವಾಗಿದ್ದುದು ಕಿಲ್ಲೆಯಲ್ಲಿ. ಅವನ ಮನೆಯಿಂದ ಅನತಿ ದೂರದ ಪತ್ಥರಪೋಡ ಗಲ್ಲಿಯಲ್ಲಿ ದಸ್ತಗೀರ ಇರತಿದ್ದ,

ದಸ್ತಗೀರನ ಜೊತೆಗಿನ ದತ್ತಣ್ಣಿಯ ಈ ಗೆಳೆತನ ಕಿಲ್ಲೆಯ ಉಳಿದ ಮಂದಿಗೆ ಸರಿಬಂದಿರಲಿಲ್ಲ. ಹೇಳಿಕೇಳಿ ಕಿಲ್ಲೆದ ಜನ ಸನಾತನವಾದಿಗಳು ಅಂತ ಹೆಸರಾದವರು.  ಮನಿಗೆ ಬಂದು ಹೇಳಿಹೋದರು. ಕೆಲವೊಮ್ಮೆ ತಾಕೀತು ಮಾಡಿದರು ಕೂಡ. ದತ್ತಣ್ಣಿ ಕೇಳಿಯೂ ಕೇಳದಂತೆ ಇದ್ದ. ಹಂಗ ಪತ್ಥರಪೋಡ ಗಲ್ಲಿಯ ಹಿರಿಯರಿಗೂ ದಸ್ತಗೀರನ ಈ ಕಾಫಿರನ ಜೊತೆಗಿನ ಸ್ನೇಹ ಸರಿಬಂದಿರಲಿಲ್ಲ. ಅವ ಶುಕ್ರವಾರದ ನಮಾಜಿಗೆ ಹೋದಾಗ ಅವನ ಸುತ್ತುವರಿದು ಬುದ್ಧಿವಾದ ಹೇಳತಿದ್ದರು.ಆದರ ಇಬ್ಬರೂ ಗೆಳೆಯಂದರು ಮಂದಿ ಮಾತಿಗೆ ತಲಿ ಕೆಡಿಸಿಕೊತಿರಲಿಲ್ಲ. ಪ್ರತಿತಿಂಗಳ ಹತ್ತರ ನಂತರ ಗೆಳೆಯರಿಬ್ಬರೂ ದಾಜೀಬಾನ ಪೇಟೆಯ ಬಾರಿನಲ್ಲಿ ಕುಳಿತು ಬೀರ ಕುಡಿಯುತ್ತ ಹರಟೆ ಹೊಡೆಯುತ್ತಿದ್ದರು.ಅನಂತ ಮತ್ತು ಅಸೀಫ ಗೆಳೆತನದ ವಾರಸಾ ಮುಂದುವರೆಸಿಕೊಂಡು ಹೋಗಲಿ ಎಂಬುದು ಅವರ ಮನದಿಂಗಿತ. ಪ್ರತಿ ರಾಖಿ ಹಬ್ಬಕ್ಕ ದಸ್ತಗೀರನ ಮಗಳು ಫಾತಿಮಾ ಅನಂತನಿಗೆ ರಾಖಿಕಟ್ಟಲಿಕ್ಕೆ ಬರತಿದ್ದಳು. ಆದರ ಈ ಫಾತಿಮಾನ ಗೆಳೆಯರ ನಡುವಿನ ಗೋಡೆ ಏಳಲಿಕ್ಕೆ  ಅಡಿಪಾಯ ಆಗಬಹುದು ಎಂದೂ ಯಾರು ಊಹಿಸಿರಲಾರರು.

ಪಿಯುಸಿ ಮುಗಿಸಿದ ಫಾತೀಮಾಗ ಮುಂದ ಟೀಚರ ಆಗುವ ಆಸೆ ಅದಕ್ಕೆ ಬೇಕಾದ ಮುಂದಿನ ಓದಿಗೆ ತಯಾರಿ ನಡಸಿದ್ದಳು.ಅಸೀಫಗ ಇದು ಸರಿ ಬರಲಿಲ್ಲ. ಏನು ಕಲತು ನವಕರಿ ಮಾಡುದು ಬೇಡ, ಮದುವೆಯಾಗು ಇದು ಅವನ ಹಟ. ಅವನಿಗೆ ಬೆಂಬಲವಾಗಿ ನಿಂತವಳು ಅವನ ತಾಯಿ.ಮಗ ಮತ್ತು ಹೆಂಡತಿಯ ಮಾತಿಗೆ ಕರಗಿದ ದಸ್ತಗೀರನೂ ಫಾತಿಮಾಳ ಕನಸಿಗೆ ಕಲ್ಲು ಹಾಕಿದ. ಇದನ್ನು ಬೇಡಿರದಿದ್ದ ಅವಳು ಕಂಗೆಟ್ಟಳು ಆಗ ನೆನಪಾದಾವ ಅವಳ ದತ್ತಣ್ಣಿ ಚಾಚಾ. ಅವ ತನ್ನ ಅಬ್ಬಾನಿಗೆ ತಿಳಿಸಿಹೇಳಬಹುದು ಅನ್ನುವ ಆಸೆಯಿಂದ ದತ್ತಣ್ಣಿ ಬಳಿ ಎಲ್ಲ ಹೇಳಿಕೊಂಡಳು. ಮಗಳ ಸಮಾನಳಾದವಳ ಕನಸಿಗೆ ಇಂಬುಕೊಡಲು ಅವ ನಿರ್ಧಾರ ಮಾಡಿದ ಗೆಳೆಯನ ಮನ ಒಲಿಸುವುದಾಗಿ ಹೇಳಿದ. ಅಂದಂತೆ ಅವ ಒಂದು ರವಿವಾರ ದಸ್ತಗೀರನ ಮನೆಗೆ ಹೋದ. ಅಲ್ಲಿ ಅಸೀಫ ಇದ್ದಿದ್ದು ಅನುಕೂಲಾತು ಯಾಕೆಂದರೆ ಫಾತಿಮಾಳ ಪ್ರಕಾರ ತನ್ನ ಅಣ್ಣನದೇ ಪ್ರಬಲ ವಿರೋಧವಿತ್ತು. ಅಸೀಫ ದತ್ತಣ್ಣಿಯ ಮಾತುಗಳನ್ನು ನಡುವೆಯೇ ತುಂಡರಿಸಿದ.ಇನ್ನೂ ಮೀಸೆ ಬಲಿತಿರದವ..ಚಿಕ್ಕವನಿದ್ದಾಗ ಚಾಚಾ ಎಂದು ತೊಡೆಮೇಲೆ ಆಡಿದವ, ಅವನ ಮಾತು ಖಾರವಾಗಿದ್ದವು.

"ಇದು ನಮ್ಮನಿ ವಿಚಾರ..ನಮ್ಮ ಮಂದಿ ಮುಂದ ನಾವು ಗೈರಾಗಲು ತಯಾರಿಲ್ಲ. ಇಷ್ಟಕ್ಕೂ ನೌಕರಿ ಮಾಡುವುದರಿಂದ ಏನಾಗತದ ಹೆಂಗಸೂರು ಏನಿದ್ದರೂ ಸಂಸಾರ ಮಾಡಾಕ ಮಾತ್ರ..ನಾವು ನೋಡಿದ ಹುಡುಗ ಛಲೋ ಅದಾನು ಅಕಿ ರಾಣಿ ಹಂಗ ಇರತಾಳ.." .

"ಆದರ ಅಕಿಗೆ ಕನಸವ ಅಲ್ಲೋ ಅಕಿ ಟೀಚರ ಆಗಬೇಕಂತಾಳ ಅಕಿ ಆಶಾಕ ಕಲ್ಲು ಹಾಕಬ್ಯಾಡರಿ..ದಸ್ತಗೀರ ನೀ ಅಕಿ ತಂದಿ ಇದ್ದೀ ನೀ ನಿರ್ಣಯ ಹೇಳು..'' ದತ್ತಣ್ಣಿ ಗೆಳೆಯ ಮಗ ಮಾತನಾಡಿದರೂ ಸುಮ್ಮನಿದ್ದುದು ನೋಡಿ ತಿವಿದ.

" ಅಕಿಗೆ ಸಲಿಗಿ ಕೊಟ್ಟು ತಪ್ಪಾಗೈತಿ..ಕಾಫಿರ ಮನಿಗೆ ಹೋಗಿ ಛಾಡಾ ಹೇಳ್ಯಾಳ.." ಅಸೀಫ ಎಲ್ಲರೂ ನೋಡುತ್ತಿದ್ದಂತೆಯೇ ಫಾತಿಮಾಳ ಕೆನ್ನೆಗೆ ಹೊಡೆದ. ದತ್ತಣ್ಣಿಗೆ ಬಹಳ ಕೆಟ್ಟನಿಸಿತು.. ನನ್ನ ಸಲುವಾಗಿ ಅಕಿ ಹೊಡತಾ ತಿನಬೇಕಾತಲ್ಲ ಅಂತ ಅವನಿಗೆ ಸಂಕಟ ಆದರ ಅಕಿ ಅಪ್ಪ ಕಲ್ಲ ಕೂತಂಗ ಸುಮ್ಮನಿದ್ದ. ಇನ್ನು ಅಲ್ಲಿ ಕೂತು ಏನೂ ಉಪಯೋಗವಿಲ್ಲ ಅಂತ ಅನ್ನಿಸಿ ದತ್ತಣ್ಣಿ ಎದ್ದ. ಒಳಗಿನಿಂದ ಫಾತಿಮಾಳ ಅಳುವಿನ ದನಿ ಕೇಳುತ್ತಿತ್ತು.

ಈ ಪ್ರಕರಣ ಗೆಳೆಯರ ನಡುವೆ ಬಿರುಕು ಬಿಡಲು ಬುನಾದಿಯಾಯಿತು. ದತ್ತಣ್ಣಿ ತನ್ನ ಹೆಂಡತಿ ಮುಂದೆ ಎಲ್ಲ ಹೇಳಿಕೊಂಡಿದ್ದ.ಅದು ಅನಂತನ ವರೆಗೂ ತಲುಪಿತ್ತು. ಮಗನಿಂದಲೂ ಸಿಕ್ಕಿದ್ದು ಭತ್ರ್ಸನೆಯೇ. ಹಂಗ ನೋಡಿದರ ಮಗನಿಂದ ಬೇರೆನೂ ಅಪೇಕ್ಷೆ ಇರಲಿಲ್ಲ. ಅವನಿಗೆ ಅಪ್ಪನ ಗೆಳೆತನ ಮುಂದುವರೆಸುವುದು ಬೇಕಾಗಿರಲಿಲ್ಲ ಆ ಮಂದಿ ದಗಾಕೋರರು, ನಂಬಿಕೆ ಅವರ ಮೇಲೆ ಇಡುವುದು ಮೂರ್ಖತನ ಇದು ಅವನ ವಾದ. ಅನಂತ  ಸಂಘಟನೆಯಲ್ಲಿ ತೊಡಗಿಸಿಕೊಂಡಿದ್ದವ. ಹಂಗ ನೋಡಿದರ ಕಿಲ್ಲೆಕ್ಕೂ ಸಂಘಟನೆಗೂ ಹಳೆಯ ನಂಟು. ದತ್ತಣ್ಣಿ ಸಣ್ಣವನಿದ್ದಾಗ ಮರಾಠಿಸಾಲೆಯ ಬಯಲಿನಲ್ಲಿ ಭಗವಾ ಝಂಡ ಹಾರಿಸುತ್ತ ಕವಾಯತು ಮಾಡುತ್ತಿದ್ದರು. ದತ್ತಣ್ಣಿಯ ವಾರಿಗೆಯ ಅನೇಕ ಗೆಳೆಯರು ಅಲ್ಲಿ ಹೋಗುತ್ತಿದ್ದರು ಒಂದೆರಡು ಸಲ ದತ್ತಣ್ಣಿನೂ ಹೋಗಿದ್ದ. ತನಗಿಂತಲೂ ಉದ್ದವಾದ ಲಾಠಿ ತಿರುವುದು ತ್ರಾಸಾಗಿ ಬಿಟ್ಟಿದ್ದ. ಅನಂತ ಪೂರ್ಣಪ್ರಮಾಣದಲ್ಲಿ ಆ ಸಂಘಟನೆಯಲ್ಲಿ ಇನ್ವಾಲ್ವ ಆಗಿದ್ದ.ಅವನ ಗೆಳೆಯಂದಿರು ಆಗೀಗ ಮನೆಗೂ ಬರತಿದ್ದರು. ಹಲವು ಸಲ ಅವರಾಡುವ ಮಾತು ದತ್ತಣ್ಣಿಯ ಕಿವಿಗೂ ಬೀಳುತ್ತಿದ್ದವು. ಆ ಮಾತುಗಳಲ್ಲಿ ಹೆಚ್ಚಾಗಿ ಇರುತ್ತಿದ್ದುದು ಮುಸಲ್ಮಾನರ ಮೇಲಿನ ಕಿಡಿ. ಆವೇಶ ಭರಿತರಾಗಿ ಅವರು ಮಾತಾಡುತ್ತಿದ್ದರು. ಮಗ ಇಂತಹ ತೀವ್ರ ಮಂದಿಯ ಗೆಳೆತನ ಬೆಳೆಸಿದ್ದು ಸರಿ ಬಂದಿರಲಿಲ್ಲ. ಅವನಿಗೆ ತಿಳಿಹೇಳಲು ಪ್ರಯತ್ನಿಸಿ ಸೋತಿದ್ದ. ಅಂತೆಯೇ ಮಗನಿಂದ ಅವನಿಗೆ ಉಪದೇಶವೂ ಸಿಗುತ್ತಿತ್ತು. ಯಾವುದೋ ಪುಸ್ತಕದ ವಸ್ತು ಬಾಯಿಪಾಠ ಮಾಡಿ ಒಪ್ಪಿಸುವವರಂತೆ ಇರುತ್ತಿತ್ತು. ದತ್ತಣ್ಣಿಗೆ ಅಂತಹ ಪುಸ್ತಕಗಳು ಅದರಲ್ಲಿನ ಉಪದೇಶಗಳು ಹೊಸದಲ್ಲ. ಅವ ಯುವಕನಾಗಿದ್ದಾಗ ಯಾರೋ ಒಂದು ಪುಸ್ತಕ ಕೊಟ್ಟು ಓದಿ ಜಾಗೃತರಾಗಲು ಹೇಳಿದ್ದರು. ಒಂದೆರಡು ಪುಟ ಓದುವುದರಲ್ಲಿ ಅದರಲ್ಲಿ ಅಡಕವಾಗಿರೋದು ದ್ವೇಶಬೋಧೆ ಮಾತ್ರ ಅಂತ ಅವನಿಗೆ ಮನದಟ್ಟಾಗಿತ್ತು. ಓದುವುದು ನಿಲ್ಲಿಸಿದ್ದ. ಮಗನಿಗೆ ತಿದ್ದುವ ಅವನ ಪ್ರಯತ್ನ ಹುಸಿಹೋಗುತ್ತಿತ್ತು. ಫಾತೀಮಾಳ ಪ್ರಕರಣದಲ್ಲಿ ಅಪ್ಪ ವಹಿಸಿದ ಹಿತಾಸಕ್ತಿ ಅದಕ್ಕೆ ಸಿಕ್ಕಿದ ಪ್ರತಿಫಲ ಎರಡೂ ಅನಂತ ಮೊದಲೇ ಊಹಿಸಿದ್ದನಂತೆ.

"ಅವರು ಒಂದು ನಮೂನಿ ಕೆಸರು ಅವರಿಗೆ ಕಲ್ಲು ಒಗದರ ತಾಕುವುದು ನಮಗ.." ಎಂಬ ಅನಂತನ ಟೀಕೆಯ ಮಾತು ಅನಂತನಿಗೆ ನೋವು ತಂದಿತ್ತು. ಆದರೆ ಅದಕ್ಕೂ ದಿಗಿಲಾದದ್ದು ಗೆಳೆಯ ದಸ್ತಗೀರನಲ್ಲಾದ ಬದಲಾವಣೆ.

ಹಂಗ ನೋಡಿದರ ದಸ್ತಗೀರ ಎಂದೂ ನಮಾಜು ತಪ್ಪಿಸಿದವನಲ್ಲ. ಓಣಿಯ ಮಸೀದಿಯ ಮೀಟಿಂಗುಗಳಲ್ಲಿ ಭಾಗಿಯಾಗುತ್ತಿದ್ದ. ಆದರೂ ಒಂದು ಸುರಕ್ಷಿತ ಅಂತರ ಅವ ಕಾಯ್ದುಕೊಂಡು ಬಂದಿದ್ದ. ಅವನ ಜಮಾತಿನ ಅನೇಕ ಹಿರಿಯರು ಅವನನ್ನು ಬದಲಾಯಿಸಲು ಪ್ರಯತ್ನ ಪಟ್ಟಿದ್ದರು. ಆದರೆ ಫಾತೀಮಾಳ ಪ್ರಕರಣ ಎಲ್ಲದಕೂ ನಾಂದಿ ಆಯಿತು ಎಂಬಂತೆ ದಸ್ತಗೀರ ಬದಲಾದ. ದಪ್ಪನಾಗಿ ಮೀಸೆ ಬಿಟ್ಟವ ಅದನ್ನು ತೆಗೆಸಿದ ದಾಡಿ ಬೆಳೆಸಿಕೊಂಡ . ಕೆಲಸ ಮಾಡುವಾಗ ಮಾತ್ರ ಪ್ಯಾಂಟು ಶರ್ಟು, ಉಳಿದಂತೆ ಸಡಿಲವಾದ ಪೈಜಾಮ ಅದರ ಕಾಲುಗಳು ಗಿಡ್ಡವು, ತಲೆಯಮೇಲೊಂದು ಟೋಪಿ ಹಿಗೆ ಅವನ ವೇಶಭೂಶ ಬದಲಾತು. ಕೆಲವರು ಹೇಳುವಹಾಗೆ ಫಾತೀಮಾಳನ್ನು ಮದುವೆ ಮಾಡಿಕೊಟ್ಟ ಮನೆತನ ತೀರ ಸಂಪ್ರದಾಯ ಪಾಲಿಸುವವರು ಅವರನ್ನು ಮೆಚ್ಚಿಸಲು ಅವ ಹೀಗೆ ಬದಲಾಗಿದ್ದಾನೆ ಅಂತ. ದತ್ತಣ್ಣಿಗೂ ಗೆಳೆಯನ ಈ ಬದಲಾದ ವರಸೆ ವಿಚಿತ್ರ ಅನ್ನಿಸಿತ್ತು.
ಈಗೀಗ ದಸ್ತಗೀರ ಸಿಗುವುದೇ ಅಪರೂಪ ಆಗಿತ್ತು. ಮೊದಲಿನ ಹಾಗೆ ಅವ ಮನೆಗೆ ಬರುತ್ತಿಲ್ಲ ಎಂಬ ಸಂಗತಿ ಮನದಟ್ಟಾಗಿತ್ತು. ಪ್ರತಿತಿಂಗಳೂ ಸೇರುವ ಬಾರಿಗೂ ಅವ ಬರುತ್ತಿರಲಿಲ್ಲ ಈಗೀಗ .ಫೋನಿನಲ್ಲೂ ಈಗ ಅವ ಸಲಿಗೆಯಿಂದ ಮಾತನಾಡುವುದಿಲ್ಲ . ವಿಚಿತ್ರ ಅಂದರೆ "ಬಾರಲೇ ಹೋಗಲೇ.." ಅನ್ನುವ ಬದಲು " ಸಲಾಂ ಆಲೈಕುಂ ಖೈರಿಯತ್.." ಅಂತೆಲ್ಲ ದಸ್ತಗೀರ ಮಾತನಾಡಲು ಸುರುವಿಟ್ಟಿದ್ದ. ದತ್ತಣ್ಣಿ ಮತ್ತು ದಸ್ತಗೀರರ ನಡುವೆ ಅಂತರ ಹೆಚ್ಚಿದಂತೆಲ್ಲ ಖುಶಿಪಟ್ಟವ ಅಂದರೆ ಅನಂತ. ಅಪ್ಪನಿಗೆ ಹೇಳಿ ಹೇಳಿ ಆಗದಿದ್ದುದು ತಾನಾಗಿಯೇ ಆಗುತ್ತಿರುವುದಕ್ಕೆ ಅವನಿಗೆ ಸಂತೋಶವಿತ್ತು.

ಸಂಪರ್ಕ ಕಮಿಯಾಗಿ ಕೊನೆಗೆ ಕಡಿದು ಹೋಗುವ ಸ್ಥಿತಿ. ಆಗೊಮ್ಮೆ ಈಗೊಮ್ಮೆ ದಸ್ತಗೀರ ಸಿಕ್ಕರೂ ಮುಗಮ್ ಆಗಿ ಮಾತಾಡುತ್ತಿದ್ದ.ಮೊದಲಿನ ನಗೆ ಚಾಷ್ಟಿ ಎಲ್ಲಾ ಹೋಗಿ ಮಾತು ಬರೀ ನೀರಸ ಆಗಿತ್ತು. ದತ್ತಣ್ಣಿ ಬರುವ ದೀಪಾವಳಿಗೆ ಫರಾಳಕ್ಕೇನೋ ಆಮಂತ್ರಿಸಿದ ಆದರೆ ಗೆಳೆಯ ಬರುವ ಬಗ್ಗೆ ಅವನಿಗೆ ಖಾತ್ರಿಇರಲಿಲ್ಲ. ದೀಪಾವಳಿಯ ಫರಾಳ ಗೆಳೆಯ ಬರದೇ ಕರಗಿ ಹೋಗಿತ್ತು..ಮುಂದ ಎಂಟುದಿನಕ್ಕ ಈದ್ ಹಬ್ಬ. ಗೆಳೆಯ ಕರೆಯದಿದ್ದರೂ ದತ್ತಣ್ಣಿ ಹೋಗಿದ್ದ. ದಸ್ತಗೀರ ಮನೆಯಲ್ಲಿರಲಿಲ್ಲ..ಬುರಖಾ ಹಾಕಿಕೊಂಡ ಅವನ ಹೆಂಡತಿ ಪಡದೆಯ ಹಿಂದಿನಿಂದಲೇ ಹೇಳಿದಳು..ಮೊದಲಿನ ಹಾಗೆ ಮಾತುಕತೆ ಇಲ್ಲ. ದತ್ತಣ್ಣಿಗೆ ಇರಿಸುಮುರಿಸಾಗಿ ಹೊರಟ. ದಾರಿಯ ತಿರುವಲ್ಲಿ ದಸ್ತಗೀರ ಭೇಟಿಯಾದ.

ಇವನ ಹಬ್ಬದ ಅಭಿನಂದನೆಗು ಅವನ ಅನ್ಯಮನಸ್ಸಿನ ಉತ್ತರ.,ಮಗ ಕೆಲಸಕ್ಕೆ ಹತ್ತಿದ್ದು, ಮುಂಬಯಿಯಲ್ಲಿ ಕೆಲಸ ಸಿಕ್ಕಿರುವುದಾಗಿ ಹೇಳಿದ. ಪ್ರಶ್ನೆಗೆ ಒಂದೋ ಎರಡೋ ಶಬ್ದದಲ್ಲಿ ಮಾತ್ರ ಉತ್ತರ ಕೊಡುವ ಗೆಳೆಯ ಅಪರಿಚಿತನಂತೆ ಕಂಡ. ಸಣ್ಣವರಿದ್ದಾಗ ಕೆಲವು ಸಲ ಒಂದೇ ಡಬ್ಬಿ ಹಂಚಿಕೊಂಡು ತಿಂದವರು..ಇಂದು ಅಪರಿಚಿತರಂತೆ ವರ್ತಿಸಬೇಕಾಗಿ ಬಂದುದು
ಸಹಜವಾಗಿಯೇ ದತ್ತಣ್ಣಿಗೆ ನೋವು ತಂದಿತ್ತು. ಅದೂ ದಸ್ತಗೀರ ಹೆದರಿ ಹೆದರಿ ಮಾತನಾಡುತ್ತಿದ್ದ. ಗಳಿಗೆಗೊಮ್ಮೆ ತನ್ನನ್ನು ಯಾರೋ ನೋಡುತ್ತಿದ್ದಾರೆ ಎಂಬ ಆತಂಕದಿಂದ ಅಲ್ಲಿ ಇಲ್ಲಿ ನೋಡುತ್ತಿದ್ದ. ಗೆಳೆಯನ ಈ ವರ್ತನೆ ಸರಿಬರಲಿಲ್ಲ ದತ್ತಣ್ಣಿಗೆ,ಕೇಳಿಯೂ ಬಿಟ್ಟ. ಉತ್ತರ ಅನಿರೀಕ್ಷಿತ ವಾಗಿತ್ತು. ತಮ್ಮಿಬ್ಬರ ಗೆಳೆತನ ಜಮಾತ್ ಮಂದಿಗೆ ಸರಿ ಬರೋದಿಲ್ಲ..ಓಣಿಯಲ್ಲಿ ಮಾತು ಕೇಳಬೇಕಾಗುತ್ತದೆ ಮುಖ್ಯವಾಗಿ ಫಾತೀಮಾಳ ಮನೆಯವರಿಗೆ ಈ ಸಂಗತಿ ಗೊತ್ತಾದರೆ ತೊಂದರೆ ..ಇತ್ಯಾದಿ ದಸ್ತಗೀರ ಹೇಳಿದ ಇವನ ಉತ್ತರಕ್ಕೂ ಕಾಯದೇ "ಅಲ್ಲಾಹ ಹಾಫೀಜ" ಅಂತ ಹೇಳಿ ಹೊರಟುಹೋದ. ದತ್ತಣ್ಣಿಗೆ ಅವನ ಮಾತು ಪೂರ್ತಿ ಒಳಗಿಳಿಯಲಿಲ್ಲ. ಮೂಲೆಯ ಹೊಟೆಲನಲ್ಲಿ ಕುಳಿತು ಚಹಾ ಕುಡಿಯುತ್ತ ಕೂತವಗ ಈ ಹಿಂದೆ ಕಿಲ್ಲೆದಲ್ಲಿ ಮನೆವರೆಗೂ ಬಂದು ಒಂದು ರೀತಿ ಧಮಕಿ ಕೊಟ್ಟುಹೋದ ಪಾಠಕನ ಮಾತು ನೆನಪಿಗೆ ಬಂದವು.. "ದತ್ತಣ್ಣಿ ಹಿಂದಿನ ಹಂಗ ಆ ಮಂದಿ ಈಗಿಲ್ಲ ಬಹಳ ಹೆಚಿಗೊಂಡಾರ ಅವರ ಜೋಡಿ ಸಲಿಗಿ ಕಮಿ ಮಾಡರಿ ಇದು ನಿಮಗೂ ನಿಮ್ಮ ಕುಟುಂಬಕ್ಕೂ ಛಲೋ.." ಅವನ ಮಾತಿಗೆ ಲಕ್ಷಕೊಡದೆ ಮುಂದುವರೆದಿದ್ದೆ. ಗೆಳೆತನದಾಗ ಈ ಜಾತಿ ಧರ್ಮ ಬರಬಾರದು ಅಂತ ನಿಲುವು ತಳೆದಿದ್ದ. ಈಗ ದಸ್ತಗೀರನೂ ಇಂತಹುದೇ ಸುಳಿಯಲ್ಲಿ ಸಿಕ್ಕಾನ ಅವ ಅದರಿಂದ ಹೊರಗ ಬರಲಿ ಅಂತ ಆಶಿಸಿದ ದತ್ತಣ್ಣಿ.

ಅಸೀಫ ಮುಂಬಯಿಯಲ್ಲಿ ಕೆಲಸ ಮಾಡುತ್ತಿದ್ದವ ಎಂಟು ತಿಂಗಳ ನಂತರ ವಾಪಸ ಬಂದಿದ್ದ. ಮಗನ ಪಗಾರ ಛಲೋ ಇತ್ತು. ಆದರ ಕೆಲಸ ಬಿಟ್ಟು ಬಂದಿರುವುದಾಗಿ ಅವ ಹೇಳಿದಾಗ ದಸ್ತಗೀರನಿಗೆ ದಿಗಿಲು. ಅವನಿಗೊಂದು ಮದುವೆ ಮಾಡುವ ಮಾತು ಆಡಿದ. ಆರು ತೀಂಗಳ ನಂತರ ಅಂದ ಮಗ ಪರಕೀಯನಂತೆ Pಕಂಡ. ಫಾತೀಮಾ ಈಗ ಎರಡು ಮಕ್ಕಳ ತಾಯಿ. ಮೊದಲಿನ ಹಾಗೆ ಅಸೀಫ ಇಲ್ಲ. ಈಗ ಜೀನ್ಸ ಪ್ಯಾಂಟಹಾಕುತ್ತಾನೆ ಹಾಗೆಯೇ ತಲೆಮೇಲೆ ಟೋಪಿಯು ಇಲ್ಲ ಆದರೂ ಮಸೀದೆಗೆ ಹೋಗಿ ನಮಾಜು ಮಾಡುವುದು ಬಿಟ್ಟಿರಲಿಲ್ಲ. ಅಂತೆಯೇ ಅವನ ಗೆಳೆಯರ ಗುಂಪು ಅವಾಗಿವಾಗ ಊರುರು ಸುತ್ತುತ್ತಿದ್ದರು. ಕೆಲವೊಮ್ಮೆ ಮನೆಯ ಅಟ್ಟದ ಮೇಲೆ ಮೀಟಿಂಗ ಮಾಡುತ್ತಿದ್ದರು ಹಾಗೆಯೇ ಆಸೀಫನ ಬಳಿ ಈಗ ಲ್ಯಾಪಟಾಪ ಬಂದಿತ್ತು. ದಸ್ತಗೀರನಿಗೆ ಮಗನ ಚಲನವಲನ ನಡವಳಿಕೆ ಗೆಳೆಯರ ಜೊತೆಗಿನ ಗುಸುಗುಸು ಮಾತು ಸರಿಬರುತ್ತಿರಲಿಲ್ಲ. ಒಂದೆರಡು ಸಲ ಆ ವಿಷಯವಾಗಿ ವಾದವಿವಾದವೂ ಆಗಿದ್ದವು. ದಸ್ತಗೀರ ಆತಂಕ ಪಡಲು ಕಾರಣ ಇರದೇ ಇರಲಿಲ್ಲ. ಬೆಂಗಳೂರಿನಲ್ಲಿದ್ದು  ಈಗ ನಿವೃತ್ತಿಯ ನಂತರ ಓಣಿಯಲ್ಲಿ ತಮ್ಮ ಹಳೆಯ ಮನೆ ನವೀಕರಿಸಿ ವಾಸವಾಗಿರುವ ಖಾನಸಾಹೇಬರು ಹುಡುಗರ ಗುರು ಆಗಿದ್ದರು. ಅವರ ತೋಟದಲ್ಲಿ ಹುಡುಗರು ಸೇರುತ್ತಾರೆ ಅದಾರೋ ಕಾಸಿಂ ಎಂಬುವ ಮನುಷ್ಯ ಆಗಾಗ ಬಂದು ಹೋಗುತ್ತಾನೆ ಏನೇನೋ ಹೇಳುತ್ತಾನೆ ಹುಡುಗರಿಗೆ ಉಪದೇಶ ಮಾಡುತ್ತಾನೆ ಅಂತೆಲ್ಲ ಸುದ್ದಿ ಇದ್ದವು.ಈ ವಿಷಯ ದಸ್ತಗೀರಗೂ ಗೊತ್ತಿತ್ತು. ಮಗನೊಡನೆ ಕೇಳಿದಾಗ ನೇರ ಉvತ್ತರ ದೊರೆತಿರಲಿಲ್ಲ.ಖಾನಸಾಹೇಬರ ಸಹವಾಸವೇ ಮುಂದಿನ ಎಲ್ಲ ಅನಾಹುತಗಳಿಗೆ ನಾಂದಿಯಾಗಬಲ್ಲದು ಆಂತ ದಸ್ತಗೀರನಿಗೆ ಅಂದಾಜು ಬರಲಿಲ್ಲ.

ದಸ್ತಗೀರ ಒಂದು ಕಂಪ್ಯೂಟರ ರಿಪೇರಿ ಅಂಗಡಿ ತೆರೆಯಲು ಹಣ ಕೇಳಿದಾಗ ಖಾನಸಾಹೇಬರೆ ಕೊಟ್ಟಿದ್ದರು. ಮೇಲಾಗಿ ಅಸೀಫನ ಮೇಲೆ ಅವರಿಗೆ ವಿಶೇಷ ಮಮತೆ..ಅವರ ಜೊತೆ ಮುಖತಃ ಅಲ್ಲದೇ ಫೋನಿನಲ್ಲೂ ಆಗಾಗ ಅಸೀಫ ಮಾತಾಡುತ್ತಿದ್ದ. ಅಸೀಫನ ಗೆಳೆಯನ ತಂದೆ ಗುಡುಸಾಬ ಒಮ್ಮೆ ಸಿಕ್ಕಾಗ ಅಸೀಫನ  ಮೇಲೆ ನಿಗಾ ಇಡುವಂತೆ ಹೇಳಿದ್ದ.ಅವ ಯಾಕೆ ಹೀಗೆ ಹೇಳಿರಬಹುದು ಈ ವಿಶಯ ಕೊರೆಯುತ್ತಿತ್ತು. ಅಸೀಫ ಪ್ರಶ್ನೆ ಕೇಳಿದರೆ ಸಿಡಿಮಿಡಿ ಮಾಡುತ್ತಿದ್ದ. ಮನೆಯಲ್ಲಿ ಅಶಾಂತಿಯ ವಾತಾವರಣ ದಸ್ತಗೀರಗೂ ಬೇಡ ಅನಿಸಿತ್ತು ಹೀಗಾಗಿ ಕೆದಕಿ ಕೇಳಲು ಅವನಿಗೆ ಹಿಂಜರಿತವಿತ್ತು. ಗುಡುಸಾಬನ ಮಾತು ಖರೆ ಆಗುವ ದಿನ ಬಂತು..ಒಂದು ರಾತ್ರಿ ಖಾನಸಾಹೇಬರು ಬಂದವರು ಅಸೀಫನನ್ನು ಉಟ್ಟ ಬಟ್ಟೆಯ ಮೇಲೆ ಕರಕೊಂಡು ಹೋಗಿದ್ದರು. ಎಲ್ಲಿ ಯಾಕೆ ಎಂಬ ಪ್ರಶ್ನೆಗಳು ದಸ್ತಗೀರನ ಗಂಟಲಲ್ಲಿಯೇ ಉಳಿದುಹೋದವು. ಮುಂದೆ ಆದ ವಿದ್ಯಮಾನಗಳು ಇಡೀ ರಾಜ್ಯ ವನ್ನೇ ತಲ್ಲಣಗೊಳಿಸಿದ್ದವು. ಅಹ್ಮದಾಬಾದಿನಲ್ಲಿ ವಿಧ್ವಂಸಕ ಕಾರ್ಯ ಹಮ್ಮಿಕೊಂಡ ಮುಸ್ಲಿಂ ಯುವಕರ ಗುಂಪೊಂದು ಸೆರೆಯಾಗಿತ್ತು. ಆ ಗುಂಪಿನ ಮುಖಂಡನೇ ಕಾಸಿಂ. ವಿಚಾರಣೆ ವೇಳೆ ಅವ ತನ್ನ ಹುಬ್ಬಳ್ಳಿಯ ವಾಸದ ಬಗ್ಗೆನೂ ಬಾಯಿಬಿಟ್ಟಿದ್ದ. ಅಲ್ಲಿ ಒಂದು ಸ್ಲೀಪರ ಸೆಲ್ ತಯಾರುಮಾಡಿರುವ ಸಂಗತಿ ಅಸೀಫ ಹಾಗೂ ಖಾನಸಾಹೇಬರ ಬಗ್ಗೆಯೂ ಬಾಯಿಬಿಟ್ಟಿದ್ದ. ಗುಡುಸಾಬನಿಗೆ ಅವನ ಮಗ ಹೆದರುತ್ತಲೇ ಖಾನ ಸಾಹೇಬರ ಮನೆಯಲ್ಲಿ ನಡೆಯುತ್ತಿದ್ದ ಮೀಟಿಂಗುಗಳ ಸತ್ಯ ಬಯಲುಮಾಡಿದ್ದ. ಸುದ್ದಿ ಕೇಳಿದ ದಸ್ತಗೀರ ಕುಸಿದು ಹೋದ. ಹೆಂಡತಿಯೂ ಕಂಗಾಲಾಗಿದ್ದಳು. ವಿಚಿತ್ರ ಅಂದರೆ ಖಾನಸಹೆಬರು ಊರುಬಿಟ್ಟು ಹೋಗಿದ್ದರು. ಅಂದೇ ಅಪರಾತ್ರಿ ಒಂದು ಜೀಪಿನಲ್ಲಿ ಬಂದ ಬೂಟುಗಾಲಿನ ಜನ ಮನೆಗೆ ನುಗ್ಗಿ ಅಸೀಫನ ರೂಮು ತಡಕಾಡಿದ್ದರು. ಅಸೀಫನನ್ನು ಕರಕೊಂಡು ಹೋಗಿದ್ದರು ಅಂತೆಯೇ ಅವನ ಮೊಬೈಲು, ಲ್ಯಾಪಟಾಪು ಕೆಲವು ಕಾಗದಪತ್ರ ಎಲ್ಲ ತೆಗೆದುಕೊಂಡು ಹೋಗಿದ್ದರು. ಇದ್ದಬಿದ್ದ ಧೈರ್ಯಒಟ್ಟುಮಾಡಿಕೊಂಡು ಕೇಳಿದ. ಇವನ ಪ್ರಶ್ನೆಗೆ ಉತ್ತರ ಕೊಡದೆ ಕೆಕ್ಕರಿಸಿ ನೋಡಿದರು.

ಓಣಿಯ ಜನ ಜಮಾಯಿಸಿದ್ದರು ಮರುದಿನ ಅವನ ಮನೆ ಮುಂದೆ. ಹಾಗೆಯೇ ಟಿವಿ ಚಾನಲ್‍ನವರ ವ್ಯಾನುಗಳು ಆ ಕಿರಿದಾದ ಓಣಿಯಲ್ಲಿ ತುಂಬಿಕೊಂಡವು. ರಿಪೋರ್ಟರುಗಳು ಪ್ರಶ್ನೆಗಳ ಮಳೆ ಸುರಿಸುತ್ತಿದ್ದರು. ಉತ್ತರ ಕೊಡಲಾರದೆ ದಸ್ತಗೀರ ಕಂಗಾಲಾಗಿದ್ದ. ಅವನ ಅಳಲು ಕೇಳುವ ಗರಜು ಅವರಿಗಿರಲಿಲ್ಲ. ಹೆಚ್ಚಿನ ಚಾನೆಲನವರು ತಮ್ಮ ವಿಶೇಷ ಟಿ ಪ್ಪಣಿಗಳ ಜೊತೆಗೆ ಸುದ್ದಿ ಬಿತ್ತರಿಸುತ್ತಿದ್ದರು.ಅವರ ಮಾತಿನಲ್ಲಿ ಹೇಗೆ ಅಮಾಯಕ ಮುಸ್ಲಿಂಯುವಕರು ಸುಲಭವಾಗಿ ದಾಳಗಳಾಗುತ್ತಿದ್ದಾರೆ ಅಪ್ಪ ಅಮ್ಮ ಅಮಾಯಕರಗಳಾಗಿ ನಟಿಸುತ್ತಾರೆ ಇತ್ಯಾದಿ ತಮಗೆ ತಿಳಿದಂತೆ ವರದಿ ಮಾಡುತ್ತಿದ್ದರು. ಗುಡೂಸಾಬನೂ ಟಿವಿ ಕೆಮರಾಗಳ ಮುಂದೆ ಹೇಳುತ್ತಿದ್ದ ಹೇಗೆ ತಾನು ದಸ್ತಗೀರನಿಗೆ ವಾರ್ನಮಾಡಿದ್ದು ಅವ ಕೇಳದೇ ಹೋದದ್ದು ಇತ್ಯಾದಿ ಹೇಳುತ್ತಿದ್ದ. ಆಘಾತಕ್ಕಿ ಒಳಗಾದ ದಸ್ತಗೀರ ಬಾಗಿಲು ಬಂದು ಮಾಡಿ ರೂಮುಸೇರಿದವ ಬಿಕ್ಕಿಬಿಕ್ಕಿ ಆಳಲು ಸುರುವಿಟ್ಟ. ಯಾಕೋ ಅವನಿಗೆ ದತ್ತಣ್ಣಿ ನೆನಪಾದ..ತನ್ನ ಅಳಲನ್ನು ಕೇಳಿಸಿಕೊಳ್ಳುವವ ಅವನೊಬ್ಬನೇ ಮಾತ್ರ ಈ ಭಾವನೆ ಬಲವಾಯಿತು. ಆದರೆ ದತ್ತಣ್ಣಿ ನಂಬುತ್ತಾನೆಯೇ ಮಗನ ಕಾರಭಾರ ತನಗೇನೂ ಗೊತ್ತಿಲ್ಲ ಎಂಬ ಸತ್ಯ ಅವನಾದರೂ  ತ್ತಾನೆಯೇ..ಮುಖ್ಯವಾಗಿ ಪಾಲನೆಯಲ್ಲಿ ಯಾವ ಕೊರತೆ ಕಂಡಿತು ಅಸೀಫ ಹೀಗೆಕೆ ಬದಲಾದ. ಹೆತ್ತವರ ಸಂಕಟ ಯಾಕೆ ಹೀಗೆ ಮಕ್ಕಳಿಗೆ ಅರ್ಥ ಆಗುವುದಿಲ್ಲ. ಅವನಲ್ಲಿ ಪ್ರಶ್ನೆಗಳಿದ್ದವು. ಅವನಿಗೆ ಗೊತ್ತು ದತ್ತಣ್ಣಿಯ ಬಳಿಯೂ ಉತ್ತರ ಇರುವುದಿಲ್ಲ ಆದರೆ ತನ್ನ ಅಳಲು ಕೇಳಲು ಅವ ಕಿವಿಯಾದನು ಎಂಬ ನಿರೀಕ್ಷೆ ಅವನಲ್ಲಿ ಅವನ ಹೆಗಲ ಮೇಲೆ ತಲೆಇಟ್ಟು ಅಳಬಹುದು ಮನಸ್ಸು ಹಗುರುಮಾಡಿಕೊಳ್ಳಬಹುದು..ನಿರೀಕ್ಷೆ ಹೊಸ ಬೆಳಕು ಮೂಡಿಸಿತು. ನಮ್ಮ ನಡುವೆ ಗೋಡೆಗಳನ್ನು ಬೆಳೆಯಲು ಬಿಟ್ಟು ತಪ್ಪುಮಾಡಿಯಾಗಿದೆ..ಈಗ ಗೋಡೆ ಒಡೆದು ಕೈ ಚಾಚಬೇಕು ಮತ್ತು ತಾನು ಚಾಚಿದ ಕ್ಯೆ ಹಿಡಿಯಲು  ದತ್ತಣ್ಣಿನೂ ಮುಂದೆ ಬರಬಹುದೇನೋ...ಈ ಯೋಚನೆಯಿಂದ ದಸ್ತಗೀರ ನಿರಾಳವಾದ. ಅಂತೆಯೇ  ಬಂದ ದತ್ತಣ್ಣಿಯ ಫೋನು ಅವನ ಆಸೆಗೆ ಇಂಬು ನೀಡಿತ್ತು. ಬರಲಿರುವ ಗೆಳೆಯನ ದಾರಿ ಕಾಯುತ್ತ ಅವ ಕುಳಿತ.

ಬುಧವಾರ, ಫೆಬ್ರವರಿ 29, 2012

ಕತ್ತಿ ಕತೆ..

ಅವರ ಕೈಯ್ಯಲ್ಲಿನ ಕತ್ತಿ ಮಿನುಗಿತ್ತು..
ತುದಿಗೆ ಕೇಕಿನ ಬೆಣ್ಣೆ ಮೆತ್ತಿತ್ತು..
ಹಿಂದಿರುವ ನೊಣ , ಕಾವಿ ಧರಿಸಿತ್ತು
ಗುಂಯ್ಗುಡುತ್ತಿತ್ತು...
ವಂಧಿಮಾಗಧರ ಬೋ ಪರಾಕು
ನಿಕಟಪೂರ್ವ ದೊರೆಯ ಮುಖದತುಂಬ
ಕವಿದ ಕಾರ್ಮೋಡ..
ಜಾತಿ ಒಂದೇ ವಲಂ ಎಂದು ಬಡಬಡಿಸಿದವನ
ಮುಖ ಸಪ್ಪೆ.. ಅಂತೆಯೇ ಆ ಕತ್ತಿ ನಾಲಿಗೆಗೆ
ಇಳಿದಿತ್ತು..
ಅವರೇನೋ ಕುರುಡರು ..ಚೂರಿ ಅಲಗನ್ನು
ಗುರುತಿಸಲಿಲ್ಲ... ನಾವು ನೀವು
ಕಣ್ಣಿದ್ದವರು..ಅದೆಷ್ಟೋ ಚೂರಿಗಳು ನಮ್ಮೆದೆ
ಎದೆಬಗೆದು ನೆತ್ತರ ಉಂಡರೂ ಮುಖದಿಂದಿನ್ನೂ
ಚೀತ್ಕಾರ ಬಂದಿಲ್ಲ..
ಈ ಕಾವಿ, ಖಾದಿಯ ನಡುವೆ ನಮ್ಮ ಬದುಕು
ಬರಡಾಯಿತಲ್ಲ....!!

ಶನಿವಾರ, ಫೆಬ್ರವರಿ 25, 2012

ಮಠಗಳು ಈಗ ಮಾನ್ಯವೇ

ಮೊನ್ನೆ ಸುವರ್ಣಚಾನೆಲ್ ನಲ್ಲಿ ಚರ್ಚೆ ಇತ್ತು. ನಮ್ಮ ಕರ್ನಾಟಕವನ್ನು ಸಧ್ಯ ಬಾಧಿಸುತ್ತಿರುವ
ರಾಜಕೀಯ ಅಸ್ಥಿರತೆ ಬಗ್ಗೆ. ಅಲ್ಲಿ ಕರ್ನಾಟಕ ರಾಜ್ಯದ ಪಂಚಮಸಾಲಿಸಭಾದ ಅಧ್ಯಕ್ಷರೂ
ಹಾಜರಿದ್ದರು. ಚರ್ಚಿಸುತ್ತ ಅವರಂದ ಮಾತು ಅದರ ಸಾರಾಂಶ ವಿಷ್ಟೇ ನಮ್ಮ ರಾಜ್ಯದಲ್ಲಿ
ವೀರಶೈವರದು ಪ್ರಾಬಲ್ಯ ಜನಸಂಖ್ಯೆಯಲ್ಲಿ ಹೀಗಿದ್ದು ಆ ಪಂಗಡದ ಯಾವ ಮುಖಂಡನೂ
ಮುಖ್ಯಮಂತ್ರಿಯಾಗಿ ಪೂರ್ಣಾವಧಿ ಮಾಡಲಿಲ್ಲ ಒಂದಿಲ್ಲೊಂದು ವಿಘ್ನ ಬಂದವು ಹೀಗಾಗಿ
ಈಗ ಸದಾನಂದಗೌಡ್ರು ಕೆಳಗಿಳಿದರೆ ವೀರಶೈವರೆ ಮುಖ್ಯಮಂತ್ರಿಯಾಗಬೇಕು ಎಂಬ
ಹಕ್ಕೊತ್ತಾಯ ಮಾಡಿದ್ರು. ಬಿಜೆಪಿ ಅಧಿಕಾರಕ್ಕೆ ಬರಲು ಅ ಸಮುದಾಯದ ಕೊಡುಗೆ ಇದೆ
ಇಲ್ಲವಾದರೆ ದಕ್ಷಿಣಭಾರತದ ಹೆಬ್ಬಾಗಿಲು ತೆರೆಯುತ್ತಿರಲಿಲ್ಲ ಇದನ್ನು ಆದ್ವಾಣಿ,ಜೇಟ್ಲಿ ಸಹ
ಒಪ್ಪುತ್ತಾರೆ. ಆ ಸಮುದಾಯದವರೇ ನಾಯಕರಾಗಿದ್ದು ಗೌಡ್ರು ಮೋಸ ಮಾಡಿದ್ರು ಅನ್ನುವ
ಅನುಕಂಪ ಸೇರಿ ಅವರು ಮುಖ್ಯಮಂತ್ರಿಯಾದ್ರು. ಅವರಿಗೆ ಒತ್ತಾಯ ಹೇರಲಾಗಿತ್ತೋ ಅಥವಾ
ಉಪಕಾರಸ್ಮರಣೆಯೋ ಗೊತ್ತಿಲ್ಲ ಮಠಮಾನ್ಯಗಳಿಗೆ ಹೇರಳವಾದ ದೇಣಿಗೆ ಸರಕಾರದಿಂದ
ಸಿಕ್ಕಿತು. ಊರಲ್ಲಿನ ರಸ್ತೆ,ಹಳ್ಳಿಗಾಡಿನಲ್ಲಿ ಹೆಣ್ಣು ಮಕ್ಕಳಿಗೆ ಹೋಗಲು ಕಕ್ಕಸ್ಸು ಇಲ್ಲದಿದ್ದರೂ
ದೇಣಿಗೆ ನಿಲ್ಲಲಿಲ್ಲ. ಸರಕಾರದ ದೂರಾಲೋಚನೆ ಸರಿಯಾಗಿತ್ತು..ಅವಶ್ಯ ಬಿದ್ದಾಗ ಇಲ್ಲಿಯ
ಜಗದ್(?)ಗುರುಗಳು ಪರವಾಗಿ ನಿಂತರು. ತಮ್ಮ ಉಪಕಾರ ಬುದ್ಧಿ ತೋರಿದ್ರು. ಹಿಂದೆಂದೂ
ಆಗದ ರೀತಿ ಇದು ಮಠಗಳ ಮಾತು ವೇದವಾಕ್ಯವಾಯಿತು ಅಷ್ಟೇ ಅಲ್ಲ ತಮ್ಮ ಯಡವಟ್ಟುಗಳನ್ನು
ಮುಚ್ಚಿಹಾಕಲು ಸ್ವಾಮಿಗಳ ಕಾಲು ಹಿಡಿದರೆ ತಪ್ಪೇನಿಲ್ಲ ಅನ್ನುವ ಸ್ಥಿತಿ ಎಲ್ಲರಿಗು. ಕೆಲ ಮಠಾಧೀಶರು
ಮಧ್ಯಸ್ಥಿಕೆವಹಿಸಿ ರಾಜಿ-ಕಾಝಿ ಮಾಡ್ಸಿ ಹೆಸರು ಗಳಿಸಿಕೊಂಡ್ರು--ಉದಾ.ನಮ್ಮ ಅಬಕಾರಿ ಸಚಿವರ
ಪ್ರಸಂಗ.--.ಈ ರೀತಿ ಮಠಾಧೀಶರು ಜಪ ತಪ ಬಿಟ್ಟು ಹಿಂದೆ ರಾಜರ ಆಸ್ಥಾನದಲ್ಲಿ ಮೆರೆಯುತ್ತಿದ್ದ
ಮಂತ್ರಿಗಳಾದರು , ಮುಖ್ಯನಿರ್ಣಯಗಳು, ಮಂತ್ರಿ ಪದವಿ, ಸಂಪುಟ ವಿಸ್ತರಣೆ ಹೀಗೆ ಸ್ವಾಮಿಗಳ
ಪ್ರಭಾವಳಿ ಎಲ್ಲೆಲ್ಲೂ ಇದೆ. ಬಿಜೆಪಿ ಸರಕಾರದಲ್ಲಿ ಅತು ಮಿತಿಮೀರಿದೆ.ಈಗ ಕೊಡುಕೊಳ್ಳುವಿಕೆಯ
ವ್ಯವಹಾರದಲ್ಲಿ ಸಾಮನ್ಯ ಜನರಬಗ್ಗೆ ಅವರ ಸಮಸ್ಯೆಗಳನ್ನು ಆಲಿಸಲು ಯಾರಿಗಿದೆ ಪುರುಸೊತ್ತು.
ನಾವು ಏನೇ ಮಾಡಿದ್ರೂ ನಮ್ಮ ಹಿಂದೆ ಮಠಇದೆ ನಮ್ಮ ಸಮುದಾಯವಿದೆ ಅನ್ನುವ ಗರ್ವ ಬಂದಿದೆ
ಮೊನ್ನೆಯ ನೀಲಿಕಾಂಡವನ್ನೇ ತಗೊರ್ರಿ. ಅಥಣಿಯಲ್ಲಿ ಅಂದು ಕೇಬಲ್ ಟೀವಿ ಕತ್ತರಿಸಲಾಗಿತ್ತು..
ಮರುದಿನದ ಪೇಪರ್ ಬರದಹಾಗೆ ಮಾಡಲಾಯಿತು ಸವದಿಯ ಬೆಂಬಲಿಗರು ಪಾಳೇಗಾರರಂತೆ
ವರ್ತಿಸಿದರು.ಇಷ್ಟಾಗಿಯೂ ಅಲ್ಲಿದ್ದ ಒಬ್ಬ ಜಗದ್ಗುರು ಅವರದೇನೂ ತಪ್ಪಿಲ್ಲ ಹಾಗೂ ಸಮರಂಭ ಆಯೋಜಿಸಲು
ಹುನ್ನಾರಮಾಡಲಾಯಿತು.ಕೊನೆಗೆ ಆ ಗುರುವಿಗೆ ತಪ್ಪಿನ ಅರಿವಾಯಿತೇನೋ ಅದು ಸಾಧ್ಯಆಗಲಿಲ್ಲ.
ಮಠಗಳು ಯಾರಿಂದಲೂ ಸ್ಥಾಪಿತವಲ್ಲ ನಮ್ಮ ದೇಶದ ಯಾವುದೇ ಯುಗಪುರುಷ ತನ್ನ ನಂತರ
ಆರಾಧನೆ ನಿರಂತರವಾಗಲಿ ಎಂದು ಮಠಸ್ಥಾಪಿಸಲಿಲ್ಲ ಬದಲು ತಾವಿದ್ದಷ್ಟು ದಿನ ಸತ್ಕಾರ್ಯ ಮಾಡಿದರು,
ಒಳ್ಳೆಯದನ್ನು ಹೇಳಿದ್ರು ಒಳ್ಳೆಯದನ್ನ ಮಾಡಿದ್ರು. ಆದರೆ ಅವರ ಹೆಸರು ಹೇಳಿಕೊಂಡ ಅವರ ಶಿಷ್ಯ ಅನಿಸಿಕೊಂಡವರು
ಅವರ ವಚನ,ಪದ ತಮ್ಮ ಸ್ವಾರ್ಥಕ್ಕೆ ಬಳಸಿಕೊಂಡರು, ಗದ್ದಿಗೆ, ವೃಂದಾವನ ನಿರ್ಮಾಣ ಮಾಡಿದ್ರು
ಜನ ಮರುಳಾದ್ರು ಮುಗ್ಧತೆಯನ್ನೇ ಬಂಡವಾಳಮಾಡಿಕೊಂಡ ಶಿಷ್ಯರು ಮಠಾಧೀಶರಾದ್ರು ಅಡ್ಡಪಲ್ಲಕ್ಕಿ,
ಪಾದಪೂಜೆ ಇತ್ಯಾದಿ ಆಚರಣೆಗೆ ಬಂದವು. ನಿಜ ಧ್ಯೇಯ, ಕರ್ಮ, ಧರ್ಮ ಎಲ್ಲ ಮರೆತ್ರು..ಇಂಜಿನೀಯರಿಂಗ್ ,
ಮೆಡಿಕಲ್ ಕಾಲೇಜು ಆದವು. ಜಾತಿಗೊಂದರಂತೆ ಮಠಗಳಾದವು ಅವುಗಳ ಪೀಠ ಅಲಂಕರಿಸಲು
ಜಗದ್ಗುರುಗಳು ಉದ್ಭವವಾದರು.
ಎಲ್ಲೋ ಒಂದೆರಡು ಮಠ ಬಿಟ್ಟರೆ ಎಲ್ಲ ಮಠಗಳ ಹೆಸರಿನಲ್ಲಿ ಕೋಟಿಗಟ್ಟಲೆ ಆಸ್ತಿ ಇದೆ..ಯಾರೂ ಪ್ರಶ್ನಿಸುವ
ಹಾಗಿಲ್ಲ ಅದರ ಮೂಲವನ್ನು. ಮಠಕಟ್ಟಿದ ಧ್ಯೇಯಗಳು ಗಾಳಿಗೆ ತೂರಿ ಹೋಗಿ ಅವು ದಲಾಲಿ ಅಂಗಡಿಗಳಾಗಿವೆ
ನಮ್ಮ ರಾಜ್ಯದಲ್ಲಿ ಇವುಗಳ ಪಿಡುಗು ವಿಪರೀತ. ಅದರಲ್ಲಿ ಈ ನಾಲ್ಕು ವರ್ಷದಲ್ಲಿ ಪುಕಾರು ಅತಿ ಆಗಿದೆ.
ಮಹಾರಾಷ್ಟ್ರದಲ್ಲೂ ಪುಣ್ಯ ಪುರುಷರಿದ್ದರು ತುಕಾರಾಮ್. ಗೋರ ಮುಂತಾಗಿ ಆದರೆ ಅವರ ಹೆಸರು ಬಳಸಿಕೊಂಡು
ಪೀಠನಿರ್ಮಿಸಿ ವ್ಯವಹರಿಸುವ ಬುದ್ಧಿ ಅವರಿಗೇಕೆ ಬರಲಿಲ್ಲವೋ.....

ನಾನೇ ಬರೆದ ಹನಿ ಇದೆ

ಇರುವುದೊಂದೇ ಜಗತ್ತು
ದಿನೆದಿನೇ ಕುಲಗೆಡುತ್ತಿದ್ದರೂ
ಉದಯಿಸುತ್ತಲೇ ಇದ್ದಾರೆ
ನಾಯಿಕೊಡೆಗಳಂತೆ...
ಈ ಜಗದ್ಗುರುಗಳು...!

ಬುಧವಾರ, ಜನವರಿ 18, 2012

ನಾವು ಹಾಗೂ ವಿವೇಕ





ನಾವು ಕೇಳಿದ ಓದಿದ ವ್ಯಕ್ತಿಯ ಬಗ್ಗೆ ನಮ್ಮದೇ ಆದ ಕಲ್ಪನೆಗಳಿರುತ್ತವೆ. ಅವರ ಬಗ್ಗೆ ನಮ್ಮದೇ ಆದ ನಿಲುವನ್ನು ತಳೆದಿರುತ್ತೇವೆ.
ದೇವಸ್ಥಾನ ಕೊಟ್ಟು ಗೌರವಿಸಿರುತ್ತೇವೆ. ಮುಂದೆ ಎಂದೋ ಆ ವ್ಯಕ್ತಿಯಬಗ್ಗೆ ಬೇರೆ ಅಭಿಪ್ರಾಯ ಕೇಳಿಬಂದಾಗ ನಮಗಾಗುವುದು
ಮೊದಲು ಸಿಟ್ಟು,ಕೋಪ ಇತ್ಯದಿ. ಅದು ತಿಳಿಯಾದಮೇಲೆ ಮನದಲ್ಲಿ ಅನೇಕ ಪ್ರಶ್ನೆಗಳು ಏಳುತ್ತವೆ.ಹೌದೆ ಹೀಗೂ ಇರಲು ಸಾಧ್ಯವೇ
ಅಥವಾ ನಮ್ಮ ಆರಾಧ್ಯ ದೈವ ಈ ಕೆಳಮಟ್ಟ ನಿಜಕ್ಕು ತಲುಪಿದ್ದನೆ ಅಂತ. ನಾನಿಲ್ಲಿ ಉಲ್ಲೇಖಿಸುತ್ತಿರುವುದು ಪ್ರಜಾವಾಣಿಯಲ್ಲಿ
ಬಂದ ವಿವೇಕಾನಂದರ ಬಗೆಗಿನ ಲೇಖನದ ಬಗ್ಗೆ.

ದಿನೇಶ್ ಅಮಿನಮಟ್ಟು ನನ್ನ ಶತ್ರು ಅಲ್ಲ ಹಾಗೆಯೆ ವಿವೇಕಾನಂದರ ಅಥವಾ ರಾಮಕೃಷ್ಣ ಮಠದ ಅನುಯಾಯಿಯೂ ನಾ ಅಲ್ಲ.
ಅಭುವ್ಯಕ್ತಿ ಸ್ವಾತಂತ್ರ್ಯ ಇದು ಅವಿರತ ಕೇಳಿಬರುವ ಮಾತು.ದಿನೇಶ್ ಅವರ ಲೇಖನ ಒಂದುಕಡೆ ವಾಲಿದೆಯೆ ಅಥವಾ ಅಭುವ್ಯಕ್ತಿಯ
ಸೋಗಿನಲ್ಲಿ ಎಡಪಂಥೀಯ ಅಥವಾ ಹಿಂದೂವಿರೋಧಿಯೇ ಇದು ಗಮನಿಸತಕ್ಕದ್ದು.ಇದು ಅವರ ಸ್ವಂತ ವಿಚಾರವಲ್ಲ.ಬದಲು
ಮಣಿಸಂಕರ್ ಮುಖರ್ಜಿ ಬರೆದ ಪುಸ್ತಕ ಓದಿ ಈ ಲೇಖನ ಬರೆದಿದ್ದಾರೆ. ವಿವೇಕರ ಇನ್ನೊಂದು ಮುಖದ ಪರಿಚಯ ಇದು ಮಾಡಿಸುತ್ತದೆ.
ನಾವುಗಳು ಚಿತ್ರದಲ್ಲಿ ನೋಡಿದ ಆಕಾರಕ್ಕೆ ವಿರುದ್ಧವಾಗಿ ಅವರು ಬಡಕಲಾಗಿದ್ದರು ಮೇಲಾಗಿ ನಾನಾ ರೋಗಬಾಧೆಯಿಂದ ನರಳುತ್ತಿದ್ದರು--
ಲೇಖನದಲ್ಲಿ ರೋಗಗಳ ದೊಡ್ಡ ಪಟ್ಟಿ ಇದೆ--.ಇನ್ನೊಂದು ವಿಷಯ ಒತ್ತಿ ಹೇಳಲಾಗಿದೆ ಅವರು ಅನ್ಯಧರ್ಮೀಯರನ್ನು ಪ್ರೀತಿಸುತ್ತಿದ್ದರು
ಮ್ಲೇಚ್ಛರ ಜೊತೆ ಸಹವಾಸವಿತ್ತು.ಯೇಸುಬಗ್ಗೆ ಗೌರವವಿತ್ತು ಎಂಬುದನ್ನು ಹೇಳಲಾಗಿದೆ. ಹಾಗೆಯೇ ಹಿಂದು ಧರ್ಮದಲ್ಲಿ ಬೀಡುಬಿಟ್ಟಿರುವ
ಜಾತೀಯತೆ, ಮಡಿ,ಮೈಲಿಗೆಗಳ ಬಗ್ಗೆ ಅವರಲ್ಲಿ ಜುಗುಪ್ಸೆ ಇತ್ತು. ಹೀಗಾಗಿಯೇ ಅವರು ಸ್ವದೇಶಿಯರಲ್ಲಿ ಅಪ್ರಿಯರಾಗಿದ್ದರು.ಮ್ಲೇಚ್ಛ
ಜೊತೆ ಅವರು ಊಟಮಾಡುತ್ತಿದ್ದರು ಎಂಬ ಕಾರಣಕ್ಕಗಿಯೇ ಅವರನ್ನು ದ್ವೇಷಿಸುತ್ತಿದ್ದರು. ಇನ್ನು ಅವರು ತಿಂಡಿಪೋತರಾಗಿದ್ದರು
ಹಾಗೂ ಮಾಂಸಾಹಾರ ಅವರಿಗೆ ಪ್ರಿಯವಾಗಿತ್ತು ಎಂಬ ಉಲ್ಲೇಖವಿದೆ. ಹಿಂದೆ ನಮ್ಮ ಆದಿಮಾನವರೆಲ್ಲ ಅವರೆ ತಾನೆ ಕಾಲಸರಿದಂತೆ
ನಾವು ನಮ್ಮ ಮೇಲೆ ಅನೇಕ ಕಟ್ಟಳೆಗಳನ್ನು ಹೇರಿಕೊಂಡೆವು ಇದು ಮೇಧ್ಯ ಅದು ಅಮೇಧ್ಯ ಅಂತ. ಅದು ಸರಿನೋ ತಪ್ಪೊ ಗೊತ್ತಿಲ್ಲ
ವಿವೇಕರಿಗೆ ಈ ಕಟ್ಟುಪಾಡು ಸರಿ ಕಂಡಿರಲಿಕ್ಕಿಲ್ಲ ಹೀಗಾಗಿ ಇದನ್ನು ವಿರೋಧಿಸುತ್ತಿದ್ದರು ಮಾತ್ರವಲ್ಲ ತಮ್ಮ ಈ ನಡಾವಳಿಯಿಂದ
ಅನೇಕರ ವಿರೋಧವನ್ನು ಅವರು ಎದುರಿಸಿದ್ದರು.
ಲೇಖನ ಅನೇಕ ಪ್ರಶ್ನೆಗಳನ್ನು ಎತ್ತುತ್ತೆ. ನಾವು ಪೂಜಿಸಿಕೊಂಡು ಬಂದವರ ಬಗ್ಗೆ ನಮಗೆಷ್ಟು ಅರಿವಿದೆ ಅವರು ಪ್ರಶ್ನಾತೀತರೆ
ಅವರ ಜೀವನಶೈಲಿಯ ಬಗ್ಗೆ ವಿಮರ್ಶಿಸುವುದು ತಪ್ಪೇ ಅಂತ.ನಮ್ಮಲ್ಲಿ ಪುರಾಣಗಳಿವೆ ಮಹಾಕಾವ್ಯಗಳಿವೆ ಹಾಗೆಯೇ ವೇದ ಗಳಿವೆ
ನಿಜ. ಆದರೆ ರಾಮನ ಗುಣಸ್ವಭಾವವನ್ನಾಗಲಿ ಅಥವಾ ಕೃಷ್ಣನ ಲೀಲೆಗಳ ಬಗ್ಗೆಯಾಗಲಿ ನಾವು ಹಗುರವಾಗಿ ಮಾತನಾಡುವಂತಿಲ್ಲ
ಮುಖ್ಯವಾಗಿ ಈ ಮಹಾನಾಯಕರ ಸಾಹಸಗಳ ಬಗ್ಗೆ ಪೀಳಿಗೆಯಿಂದ ಪೀಳಿಗೆ ವರೆಗೆ ಗುಣಗಾನವೇ ಪ್ರಾಮುಖ್ಯತೆ ಪಡೆದಿದೆ.
ಹೋಗಲಿ ಇತ್ತೀಚೆಗಿನ ಬಸವ, ಬುದ್ಧ ಹಾಗೂ ಅಂಬೇಡ್ಕರ್ ಬಗ್ಗೆ ನಮಗೆ ತಿಳಿದ ಅನೇಕ ಸಂಗತಿಗಳಿವೆ ಆದರೆ ಇಲ್ಲೂ ಅವರ ಗುಣಗಾನವೇ
ಪ್ರಧಾನವಾಗಿ ಒಂದು ಗುಂಪಿನ ದನಿಯೇ ದೊಡ್ದದಾಗಿ ನಾವು ಎತ್ತುವ ಪ್ರಶ್ನೆಗಳು ಕ್ಷೀಣವಾಗಿ ಬಿಡುವ ಭಯಇದೆ ಹಾಗೂ ಇದು ವಾಸ್ತವ ಕೂಡ.
ಅದರಲ್ಲೂ ರಾಜಕೀಯದ ಕರಿನೆರಳು ಎಲ್ಲ ಕಡೆ ಆವರಿಸಿದೆ ರಾಜಕೀಯಲಾಭದ ಮುಂದೆ ಅಭಿಪ್ರಾಯಗಳಿಗೆಲ್ಲಿದೆ ಕಿಮ್ಮತ್ತು.
ಅಭಿವ್ಯಕ್ತಿ ಸ್ವಾತಂತ್ರ್ಶ ಇದು ಬರೀ ಹುಸಿ ಅನ್ನುವುದು ಸಲ್ಮಾನ್ ರಶ್ದಿಯ ಭಾರತ ಭೇಟಿಗೆ ಉಂಟಾದ ವಿರೋಧದಿಂದಲೆ ಗೊತ್ತಾಗುತ್ತದೆ.
ಇಂತಹ ಸಂಧಿಗ್ಧತೆಯಲ್ಲೂ ಧೈರ್ಯವಾಗಿ ಪ್ರಶ್ನೆ ಎತ್ತಿದ ದಿನೇಶ್ ಅಭಿನಂದನೆಗೆ ಅರ್ಹರು ಅಲ್ಲವೆ.

ಶನಿವಾರ, ಡಿಸೆಂಬರ್ 17, 2011

ನಾ ಹೀಗೇಕೆ..

ಹೌದು ಈ ಪ್ರಶ್ನೆ ಕಾಡುತ್ತಿದೆ. ಬಹುಶಃ ಅನೇಕರಿಗೂ ಈ ಪ್ರಶ್ನೆ ಕಾಡುತ್ತಿರಬಹುದು.
ಸ್ವಲ್ಪ ಆರಾಮಾಗಿ ಉತ್ತರ ಹುಡುಕುವ. ಈಗ ನಾವು ನೀವು ವ್ಯವಸ್ಥೆ ಅಥವಾ
ಸರಕಾರವನ್ನು ಸುಲಭವಾಗಿ ಟೀಕಿಸುತ್ತೇವೆ.ನಮ್ಮ ದೇಶದಲ್ಲಿ ಅಭಿವ್ಯಕ್ತಿಸ್ವಾತಂತ್ರ್ಯ ಇನ್ನೂ ಇದೆ
ಹೀಗಾಗಿ ನಾವು ಪೆನ್ನಿಂದ,ಕೀಲಿಮಣೆ ಕುಟ್ಟುವುದರಿಂದ ನಮ್ಮ ಕಹಿಭಾವನೆಗಳನ್ನು
ಮುಕ್ತವಾಗಿ ಕಾರುತ್ತೇವೆ. ಅದು ನಮ್ಮ ಹಕ್ಕು ನಿಜ. ಅದನ್ನು ನಾವು ಚಲಾಯಿಸುತ್ತೇವೆ ಕೂಡ.
ಅನೇಕ ರೀತಿಯಲ್ಲಿ ಅಂದರೆ ಫೇಸಬುಕ್, ಟ್ವೀಟರ್ ಹಿಡಿದು ವಾಚಕರ ವಾಣಿವರೆಗೂ ನಮ್ಮ
ಆಕ್ರೋಶ ಹರಿಯುತ್ತದೆ. ನಮ್ಮ ಈ ಕಾರುವಿಕೆಯಿಂದ ಏನಾದರೂ ಬದಲಾಗಿದೆಯೇ..
ನಮ್ಮ ಬೀದಿಯಲ್ಲಿ ಹಗಲು ದೀಪ ಉರಿಯುವುದು ಬಂದಾಗಿದೆಯೇ..ನಮ್ಮ ನಲ್ಲಿಯಲ್ಲಿ ನೀರು
ನಿರಂತರ ಹರಿಯುತ್ತಿದೆಯೇ ಅಥವಾ ಉಗಿಸಿಕೊಂಡೂ ಕುರ್ಚಿಮೇಲೆ ಕೂಡುವ ರಾಜಕಾರಣಿ
ಒಂದರೆಕ್ಷಣ ವಿಚಾರ ಮಾಡಿದ್ದಾನೆಯೇ..? ಈ ಪ್ರಶ್ನೆಗಳಿಗೆ ಪರಿಹಾರ ಸಿಕ್ಕಿಲ್ಲ ಯಾಕೆಂದರೆ
ಇವು ನಾವು ಈಗಿರುವ ಸದ್ಯದ ಪರಿಸ್ಥಿತಿಯ ದ್ಯೋತಕ ವಾಗಿವೆ. ಹಾಗೂ ಇವುಗಳಿಗೆ ನಾವು
ಚೆನ್ನಾಗಿ ಒಗ್ಗಿಕೊಂಡಿರುವೆವು..ನಮಗೂ ಗೊತ್ತು ಇವುಗಳಿಂದ ಬಿಡುಗಡೆ ಸಾಧ್ಯವಿಲ್ಲ ಅಂತ.
ಆದರೇ ಕಾರುವುದು ಇನ್ನೂ ನಿಂತಿಲ್ಲ ..ಈಗ ಅದು ಹೊಸ ಆಯಾಮ ಪಡೆದುಕೊಂಡಿದೆ
ನಮಗೆ ನಮ್ಮ ದನಿ ಕೇಳಿಸಲು ಹೊಸ ಮುಖವಾಡಗಳು ಬಂದಿವೆ...ಅವರನ್ನು ನಾವು ನಮ್ಮನ್ನು
ಉದ್ಧಾರ ಮಾಡಲೆಂದೆ ಬಂದ ಅವತಾರಪುರುಷ ರನ್ನಾಗಿ ನೋಡುತ್ತಿದ್ದೇವೆ..ಜೈಕಾರ ಹೇಳುತ್ತಿದ್ದೇವೆ
ಅವರು ನಮ್ಮ ಸಲುವಾಗಿ ಉಪವಾಸ ಕೂತಿದ್ದಾರೆ.ಮರಗುತ್ತಿದ್ದಾರೆ ಕೂಡ.

ಹೌದು ಅಣ್ಣಾಹಜಾರೆ ಇಂದು ಅನೇಕರ ಕಣ್ಣಲ್ಲಿ ಹಿರೋ. ಗೂಗಲ್ ಕ್ಲಿಕ್ನಲ್ಲಿ ಅವರು ಕತ್ರೀನಾಗಿಂತ
ಹಿಂದಿದ್ದರೂ ಅವರ ಹೆಸರು ಈಗ ಎಲ್ಲರ ನಾಲಿಗೆಮೇಲೆ ಇದೆ.ಸರಕಾರಕ್ಕೂ ನಡುಕವಿದೆ..
ರಾವಲ್ಗಾವ್ ಸಿದ್ದಿಯಿಂದ ದೆಹಲಿವರೆಗೆ ಅಣ್ಣಾ ಪಯಣಿಸಿದ್ದಾಗಿದೆ.ಮೊನ್ನೆ ಸಿಎನೆನ್-ಐಬಿನ್ ಅವರು
ಪ್ರಶಸ್ತಿ ಸಹ ನೀಡಿ ಗೌರವಿಸಿದ್ದಾರೆ. ಜನಲೋಕಪಾಲ್ ದಲ್ಲಿ ತಮ್ಮ ಅಂಶಗಳನ್ನು ಸೇರಿಸಿಕೊಳ್ಳದಿದ್ದಲ್ಲಿ
ಜೇಲ್ ಭರೋ ಸುರುಮಾಡುವುದಾಗಿ ಅವರು ಕರೆ ನೀಡಿದ್ದಾರೆ.ಅವರ ಮಾತಿನಲ್ಲಿ ತೂಕವಿದೆ ಜನ
ಏನೋ ಪವಾಡದ ನಿರೀಕ್ಷೆಯಲ್ಲಿದ್ದಾರೆ.ಜನಲೋಕಪಾಲ್ ಜಾರಿಯಿಂದ ಭ್ರಷ್ಟಾಚಾರ ನಾಶವಾಗಲಿದೆಯೇ
ಈ ಪ್ರಶ್ನೆಗೆ ಉತ್ತರ ಹುಡುಕುವ ನಿಟ್ಟಿನಲ್ಲಿ ಕೆಲವರಾದರೂ ಯೋಚಿಸುತ್ತಿದ್ದಾರೆಯೇ ಅಥವ ಕೆಲ ಬುದ್ಧಿಜೀವಿಗಳು
ಹೇಳುವ ಹ್ಆಗೆ "ಸಮೂಹ ಸನ್ನಿ"ಯ ಪ್ರಭಾವಳಿಯ ಶಿಕಾರಿಯಾಗುತ್ತಿದ್ದೇವೆಯೇ..? ಹೌದು ಈ ಪ್ರಶ್ನೆ
ನನ್ನನ್ನು ಕಾಡುತ್ತಿದೆ. ಈ ಚಳುವಳಿಗಳು ಬೇಕಾಗಿದ್ದವು ಯಾಕ ಅಂದರ ನಾವು ಆರಿಸಿ ಕಳಿಸಿದ, ನಮ್ಮ ನೆಲ
ಜಲ,ಪ್ರಾಣಗಳ ರಕ್ಷಣೆಯ ಜವಾಬ್ದಾರಿ ಹೊತ್ತು ವಿಧಿವಿಧಾನ ತಗೊಂಡ ರಾಜಕಾರಣಿಗಳು ತಮ್ಮ ಹೆಸರಲ್ಲಿ,
ಮಕ್ಕಳ ಹೆಸರಲ್ಲಿ ಆಸ್ತಿ ಮಾಡಕೊಂಡ್ರು..ನಮ್ಮ ದುಡ್ಡಿನ್ಯಾಗ ಮಾರಿಷಸ್ ಗೆ ಕುಟುಂಬ ಸಮೇತ ಪ್ರವಾಸ ಮಾಡಿ
ಬಂದ್ರು ಹಂಗ ಸ್ವಾಮಿಗೋಳಿಗೆ ದಕ್ಷಿಣಿ ಕೊಟ್ಟು ಅಡ್ಡೂ ಬಿದ್ರು..!! ನಮಗ ಇದೆಲ್ಲ ನೋಡಿ ರೋಸಿ ಹೋಗಿತ್ತು.
ಒಂದು ಬದಲಾವಣಿ ಬೇಕಾಗಿತ್ತು.ಇಂಥಾ ಟೈಮದಾಗ ಅಣ್ಣಾ, ರಾಮದೇವ್, ಬೇಡಿ ಇವರು ಅವತಾರ ಪುರುಷರಾಗಿ
ಕಂಡ್ರು. ಅವರ ಹಿಂದ ಹೊರಟೇವಿ ದಡಾ ಮುಟ್ಟತೇವೋ ಇಲ್ಲೋ ಗೊತ್ತಿಲ್ಲ. ಆದ್ರ ಈ ದೋಣಿಯಾನದಾಗ
ನನ್ನಂಥ ಸಿನಿಕರೂ ಸೇರಿಕೊಂಡಾರ. ನನಗ ಹಲವಾರು ಪ್ರಶ್ನೆಗಳಿವೆ..ಉತ್ತರ ಹುಡುಕಿ ಸೋತಿರುವೆ..

೧) ಅಣ್ಣಾ ಚಳುವಳಿಗೆ ಈಗ ವಿರೋಧ ಪಕ್ಷದ ಬೆಂಬಲ ಸಿಕ್ಕಿದೆ. ಭಾಜಪ, ಅಥವಾ ಎಡಪಂಥೀಯರು ತಾವು
ಪ್ರಾಮಾಣಿಕರು..ಎಂದು ಎದೆ ತಟ್ಟಿ ಹೇಳಿಕೊಳ್ಳಬಲ್ಲರೇ..? ಅವರು ಆಳಿದ/ಆಳುತ್ತಿರುವ ರಾಜ್ಯದಲ್ಲಿ
ಲಂಚಗುಳಿತನ ಇರಲಿಲ್ಲವೇ,,?ಹಾಗಿದ್ದರೆ ಯಾವ ನೈತಿಕತೆ ಮೇಲೆ ಅವರು ಅಣ್ಣಾ ಜೊತೆ ವೇದಿಕೆ ಹಂಚಿಕೊಂಡ್ರು
ಸ್ವತಃ ಅಣ್ಣಾ ಅವರಿಗೆ ಈ ದ್ವಂದ್ವ ಕಾಡಲಿಲ್ಲವೇ...?
೨) ಅಣ್ಣಾ ಉಪವಾಸ ಮಾಡುತ್ತಾರೆ.ಜನ ಸ್ವಪ್ರೇರಣೆಯಿಂದ ಸೇರುತ್ತಾರೆ. ಹಾಡು,ಭಜನೆ ಇತ್ಯಾದಿ ನಡೆಯುತ್ತವೆ. ಆಣ್ಣಾ
ಕುಳಿತುಕೊಳ್ಳುವ ಪೆಂಡಾಲು, ಜನರ ಉಸ್ತುವಾರಿ ಇವುಗಳಿಗೆಲ್ಲ ದುಡ್ಡು ಬೇಕು. ಆ ದುಡ್ಡು ಬಂದ ಮೂಲಯಾವುದು
ಅದೇನು ಚಂದಾಹಣವೇ ಅಥವಾ ದಾನಿಯೊಬ್ಬ ಕೊಟ್ಟ ಬಳುವಳಿಯೇ , ಒಂದು ವೇಳೆ ದಾನಿ ಕೊಟ್ಟಿದ್ದರೆ ಅವನ
ವಿವರಗಳೇನು ಅಥವ ಆ ದುಡ್ಡು ತೆರಿಗೆ ತಪ್ಪಿಸಿ ಇಲ್ಲಿ ಸುರಿದದ್ದೋ?

ಹೌದು ಮೇಲಿನ ಪ್ರಶ್ನೆ ನೋಡಿ ನನ್ನ ಮೊಸರಿನಲ್ಲಿ ಕಲ್ಲುಹುಡುಕುವ ಚಾಳಿಯವ ಅಂತ ನೀವು ಕರೆಯಬಹುದು.
ಆದರೆ ಒಂದು ಜನಾಂದೋಲನ ಯಶಸ್ಸು ಕಾಣಬೇಕು ಇದು ನನ್ನ ಹಂಬಲ ಕೂಡ ಆದರೆ ಜೊತೆಗೆ ಮೇಲಿನ
ಪ್ರಶ್ನೆಗಳಿಗೆ ಉತ್ತರ ಸಿಗಬೇಕು ಇದು ಬಯಕೆ..!

ಭಾನುವಾರ, ಜೂನ್ 19, 2011

ಇದರ ಕತೆ ಇಷ್ಟೇ ಕಣಪ್ಪೋ....









ಹೌದು ಆ ಕತೆಬರೆದವ ಸಹ ಈ ತಿರುವು ಊಹಿಸಿರಲಿಕ್ಕಿಲ್ಲ. ನಾವು ಆರಿಸಿ ಕಳಿಸಿದ ಪಕ್ಷ
ಅದರ ಮುಖಂಡ ಇಂದು ಆಣೆ ಪ್ರಮಾಣ ಮಾಡುತ್ತಾರಂತೆ ಅವರ ಹಿಂದಿನ ಸಿಎಮ್ಮು
ಅವರ ಪಂಥಾಹ್ವಾನ ಸ್ವೀಕರಿಸಿ ಧರ್ಮಸ್ಥಳದಲ್ಲಿ ಒಂದುದಿನ ಮೊದಲೇ ಹೋಗಿ
ತಯಾರಿಯಲ್ಲಿರುತ್ತಾರಂತೆ. ಈ ಬಿಜೆಪಿ ಸರಕಾರ ಏಳುತ್ತ ಬೀಳುತ್ತ ಮೂರು ವರ್ಷ
ಕಳೆದಿದೆ. ಈಗ ಮಾಜಿ ಸಿಎಮ್ಮು ಈಗಿನ ಸಿಎಮ್ಮ ಬಗ್ಗೆ ಮೂರುವರ್ಷದಲ್ಲಿ ಮುನ್ನೂರು
ಬಾರಿ ಅಪವಾದ ಹೊರಿಸಿ ದಾಖಲೆ ಬಿಡುಗಡೆ ಮಾಡಿದ್ದಾರೆ. ಹಾಲಿ ನಮ್ಮ ಸಿಎಮ್ಮು
ಅದಕ್ಕೆ ಪ್ರತ್ಯುತ್ತರವಾಗಿ ತಮ್ಮ ರಾಜಕೀಯ ಕಾರ್ಯದರ್ಶಿ ಮೂಲಕ ಮಾಜಿ ವಿರುಧ್ದ
ಅನೇಕ ದಾಖಲೆ ಬಿಡುಗಡೆ ಮಾಡಿದಾರೆ. ಒಟ್ಟಿನಲ್ಲಿ ಈ ಮೂರುವರ್ಷದಲ್ಲಿ ನಾಡಿನ
ಜನತೆಗೆ ಭರಪೂರ್ ಮನರಂಜನೆ ಕೊಟ್ಟಿದ್ದಾರೆ. ಈಗ ಕ್ಲೈಮಾಕ್ಸ್ ಹೊತ್ತು .
ಇಲ್ಲಿ ನಾಯಕರೂ ಇಲ್ಲ ಖಳರೂ ಇಲ್ಲ. ಶ್ರೀ ಮಂಜುನಾಥನ ಸನ್ನಿಧಿಯಲ್ಲಿ ಆಯುಧಗಳಿಗೆ
ಅವಕಾಶ ಇಲ್ಲ. ಹೀಗಾಗಿ ಅಲ್ಲಿ ರಕ್ತಪಾತಕೆ ಆಸ್ಪದವಿಲ್ಲ. ಆದರೆ ದೇವರ ಸನ್ನಿಧಿಯಲ್ಲಿ
ಸುಳ್ಳು ಹೇಳಿದರೆ/ಸುಳ್ಳು ಆಣೆ ಹಾಕಿದವ ರಕ್ತ ಕಾರಿಕೊಂಡು ಸಾಯುತ್ತಾನೆ ಅಂತ ಪ್ರತೀತಿ.
ಈಗ ಈ ಹಾಲಿ ಅಥವಾ ಮಾಜಿ ಇಬ್ಬರಲ್ಲಿ ಒಬ್ಬರು ರಕ್ತಕಾರುವುದಂತೂ ನಿಕ್ಕಿ.ನನಗೆ
ಕುತೂಹಲ ಇರೋದು ಆ ರಕ್ತದ ಬಣ್ಣದ ಬಗ್ಗೆ...! ನಂಜು ನುಂಗಿ ಅದ ಉಗುಳಿದವರ ರಕ್ತ
ಕೆಂಪಗಿರಲು ಹೇಗೆ ಸಾಧ್ಯ??
ಯಾಕೆ ಹೀಗಾಗುತ್ತಿದೆ ಅಂತ ಯಾವುದೇ ಶ್ರೀ ಸಾಮಾನ್ಯ ತಲೆ ಕೆಡಿಸಿಕೊಳ್ಳುತ್ತಿಲ್ಲ
ತನ್ನ ಸುತ್ತಲಿನ ತನ್ನ ಕವಿದಿರುವ ಸಮಸ್ಯೆಗಳ ಬೆಂಕಿಗೆ ಅವ ಮೈಯೊಡ್ಡಿ ಹಿತ ಅನುಭವಿಸುತ್ತಿದ್ದಾನೆ
ಆದರೆ ಮೀಡಿಯಾದವರ ಹೊಟ್ಟೆ ಹಸಿವು ಅಗಾಧ ಹಿತ ಅನುಭವಿಸಲು ಬಿಟ್ಟರೆ ಅವರು ಉಸಿರಾಡುವುದು
ಹೇಗೆ ಅದಕ್ಕೇ ಅವರು ಅವನನ್ನು ತಿವಿದು ಎಚ್ಚರಿಸಿ ೨೭/೦೬/೨೦೧೧ ರಂದು ನಡೆಯಲಿರುವ ಆಣೆಪ್ರಕರಣ
ದ ಬಗ್ಗೆ ಅಭಿಪ್ರಾಯ ಹೇಳುವಂತೆ ಒತ್ತಾಯ ಮಾಡುತ್ತಿದ್ದಾರೆ. ಹಾಲಿ ಮಾಜಿ ಕದನ ಇತಿಹಾಸದಲ್ಲಿ
ಮೊದಲ ಬಾರಿ ಆಗುತ್ತಿರುವುದು ಹೀಗಾಗಿ ಇದನ್ನು ಕವರ್ ಮಾಡಲು ಪುಡಿಹುಡಿ ಚಾನಲ್ ಗಳಲ್ಲದೇ
ಫಾಕ್ಸ್, ಸಿಎನ್ ಎನ್ ಹಾಗೂ ಬಿಬಿಸಿ ಯವರು ಬರಲಿದ್ದಾರೆ. ಈಗಾಗಲೇ ಧರ್ಮಸ್ಥಳದ ಲಾಜ್ ಎಲ್ಲ
ಬುಕ್ ಆಗಿವೆ. ಇದೇ ಸಂಧರ್ಭ ಲಾಭಮಾಡಿಕೊಳ್ಳಲು ಶ್ರೀ ಕ್ಷೇತ್ರದ ಸುತ್ತಲಿನ ಯಾತ್ರಾಸ್ಥಳದವರೂ
ತಮ್ಮ ತಮ್ಮ ದೇವರ ದರ್ಶನ ದ ರೇಟು ಕಮ್ಮಿ ಮಾಡಿಕೊಂಡು ಕಾಯುತ್ತಿದ್ದಾರೆ.
ಒಟ್ಟಿನಲ್ಲಿ ೨೭/೦೬/೧೧ ರಂದು ನಡೆಯಲಿರುವ ಐತಿಹಾಸಿಕ ದಿನದ ಪೂರ್ವ ಮಾಹಿತಿ ಎಲ್ಲರಿಗಿಂತ
ಮೊದಲೇ ಎಕ್ಸಕ್ಲೂಸಿವ್ ಆಗಿ ನೀಡಿದ ಈ ಬ್ಲಾಗಿನ ಟಿಆರ್ ಪಿ ಹೆಚ್ಚಿಗೆಯಾಗಲಿದೆ.ಇದು ಸತ್ಯ ಈ

ಬಗ್ಗೆ ನಾನೂ ಬೇಕಾದರೆ ಆಣೆ ಮಾಡಿ ನಿರೂಪಿಸಿಯೇನು.....!!!

ಶುಕ್ರವಾರ, ಮೇ 6, 2011

ಅಂಕಿತಾರಾಣೆ--ಪಾನಿಪುರಿ ಪುರಾಣ..!














ನೀವು ಪಾನಿಪೂರಿ ಪ್ರಿಯರೇ? ಹಾಗಿದ್ದರೆ ಇದನ್ನು ತಪ್ಪದೇ ಓದಿ...!
ಹೌದು ಇದೊಂಥರಾ ವಿಚಿತ್ರ ಟೈಟಲ್ಲು. ಹತ್ತು ನಿಮಿಷದ ತನ್ನ ಬೊಗಳೆಯಲ್ಲಿ
ರಾಜಪುರೋಹಿತ್ ಎಂಬ ವ್ಯಕ್ತಿ ಸ್ವತಃ ಕೆಡುವುದಲ್ಲದೆ ತನ್ನ ಪಾರ್ಟಿ ಬಿಜೆಪಿಯ
ವರ್ಚಸ್ಸನ್ನೂ ಹಾಳುಗೆಡವಿದ. ಅಂಕಿತಾ ಅವಳ ವ್ಯಕ್ತಿತ್ವ ಅವಳ ಚಾರಿತ್ರ್ಶವಧೆ
ಮಾಡುವ ಮಾತು ಆಡಿದ ರಾಜಪುರೋಹಿತ ಈಗ ಅವಳ ಕ್ಷಮೆ ಕೇಳಿದ.
ನಮ್ಮಲ್ಲಿ ಒಂದು ಗಾದೆ ಇದೆ "ಗೋಡೆಯಲ್ಲಿರುವ ಮೊಳೆ ತಗೊಂಡು....ದಲ್ಲಿ
ಚುಚ್ಚಿಕೊಂಡ" ಅಂತ. ಈ ಗಾದೆ ರಾಜಪುರೋಹಿತ ಸಾಹೇಬಗೆ ಅಕ್ಷರಶಃ
ಅನ್ವಯವಾಗುತ್ತದೆ.
ಅಂಕಿತಾ ಮಾಡಿದ್ದು ಏನು. ತಾ ವಾಸಿಸುತ್ತಿರುವ ಬಿಲ್ಡಿಂಗಿನ ಹೊರಗೆ ಇರುವ
ಪಾನಿಪುರಿ ಅಂಗಡಿಯವ ಹಾಡುಹಗಲಲ್ಲಿ ತನ್ನ ಗಾಡಿಯ ಕೆಳಗಡೆ ಶೆಲ್ಫನಲ್ಲಿಟ್ಟ
ಜಗ್ ನಲ್ಲಿ ಮೂತ್ರಹೊಯ್ಯುವುದನ್ನು ಅವಳು ಮೊಬೈಲಿನಲ್ಲಿ ಸೆರೆಹಿಡಿದಳು.
ಪಾನಿಪುರಿ ಅದನ್ನು ತಿಂದು ಆಗಬಹುದಾದ ಅಪಾಯಗಳನ್ನು ಪುಷ್ಟೀಕರಿಸಲು
ತಾ ತೆಗೆದ ವಿಡಿಯೋ ಸಹಾಯಆಗಬಹುದು ಇದು ಅವಳ ಹವಣಿಕೆ. ಅದೇ ಹಂಬಲ
ದಲ್ಲಿ ಅವಳು ವಿಡಿಯೋ ನೆಟನಲ್ಲಿ ಹರಿಬಿಟ್ಟಳು. ಈ ಶೂಟಿಂಗ್ ಪ್ರಕರಣದ
ಎರಡು ಮೂರುದಿನ ಮೊದಲು ರಾಜ್ ಠಾಕ್ರೆಯ ಪಾರ್ಟಿಯವರು ಮುಂಬೈಯ
ಭೇಲಪುರಿ,ಪಾನಿಪುರಿ ಅಂಗಡಿ ಹಾಗೂ ಅವನ್ನು ನಡೆಸಿಕೊಂಡು ಬರುತ್ತಿರುವ
ಅನಿವಾಸಿ ಮುಂಬೈಕರ್ ಮೇಲೆ ದಾಳಿ ನಡೆಸಿದ್ದರು. ವಿಡಿಯೋ ನೋಡಿ
ರಾಜಪುರೋಹಿತ ಆಡಿದ ಮಾತು ಅವರನ್ನು ಕೆರಳಿಸಿತು. ಪೋಲಿಸ್ ಠಾಣೆಯಲ್ಲಿ
ಅಂಕಿತ ದೂರು ದಾಖಲಿಸುವಾಗ ಅವಳ ಬೆಂಗಾವಲಾಗಿ ಮನಸೇ ಜನ ಇತ್ತು.
ಅಂಕಿತಾ ವಿಡಿಯೋಕ್ಕೆ ಈಗ ರಾಜಕೀಯ ಡಿಮಾಂಡು. ನಮ್ಮ ದೇಶದಲ್ಲಿ ಏನೇ
ಘಟನೆಯೂ ರಾಜಕೀಯಬಣ್ಣ ಬಳಿದುಕೊಳ್ಳುತ್ತೆ ಅನ್ನುವುದು ಮೇಲಿನ ಸಂಗತಿಯಿಂದ
ಮತ್ತೆ ಸಾಬೀತಾಗಿದೆ.
ಅನೇಕ ಪ್ರಶ್ನೆಗಳಿವೆ..
ರಾಜಪುರೋಹಿತ್ ಆಡಿದ್ದು ಸರೀನಾ ? ಅವಳು ಆ ರೀತಿ ವಿಡಿಯೋ ತೆಗೆದಳು ಅಂದ
ಮಾತ್ರಕ್ಕೆ ಅವಳು ಕೆಟ್ಟನಡತೆಯವಳು ಅಂತ ಸರ್ಟಿಫಿಕೀಟು ಕೊಡೋದು ಸರೀನಾ?
ಅಂಕಿತ ಯಾಕೆ ರಾಜಕೀಯದಾಳ ಆದಳು. ಪ್ರಸಿದ್ಧಿ ಸುಲಭವಾಗಿ ಸಿಕ್ಕಾಗ ಆದರ್ಶ
ಮಾಯವಾಗೋದ್ಯಾಕೆ?
ನಾವಿ ಇದೆಲ್ಲ ನೋಡಿಯೂ ಓದಿಯೂ ಮತ್ತೆ ಸಾಯಂಕಾಲ ಪಾನಿಪುರಿ ತಿನ್ನುವುದೇಕೆ?
ಉತ್ತರ ಬಲ್ಲವರು ಹೇಳರಿ.